គ.ស.ម.ក រៀបចំកិច្ចពិគ្រោះយោបល់លើរបាយការណ៍ពាក់កណ្តាលអាណត្តិ នៃ UPR
ភ្នំពេញ៖ គណៈកម្មាធិការសិទ្ធិមនុស្សកម្ពុជា ( គ.ស.ម.ក ) សហការជាមួយអង្គការសហប្រជាជាតិប្រចាំព្រះរាជាណាចក្រកម្ពុជា នៅរសៀលថ្ងៃទី២៣ ខែមីនា ឆ្នាំ២០២២ បានរៀបចំកិច្ចពិគ្រោះយោបល់លើរបាយការណ៍ពាក់កណ្តាលអាណត្តិនៃការត្រួតពិនិត្យជាសកលតាមកាលកំណត់ (UPR) ដែលរៀបចំដោយរាជរដ្ឋាភិបាលបន្ទាប់ពីការត្រួតពិនិត្យជុំទី៣របស់កម្ពុជា ដែលប្រារព្ធធ្វើឡើងនៅសណ្ឋាគាររ៉ាហ្វល ឡឺរ៉ូយ៉ាល់ និងតាមរយៈប្រព័ន្ធវីដេអូ។
លោក កត្តា អន សមាជិក គ.ស.ម.ក. និង ជាប្រធាន ក្រុម ការងារ សរសេររបាយការណ៍ UPR ថ្លែងថា UPR ជាយន្តការប្លែកមួយ ដែលពិនិត្យមើលលើកាតព្វកិច្ចសិទ្ធិមនុស្ស របស់រដ្ឋសមាជិកអង្គការសហប្រជាជាតិនីមួយៗ តាមពេលវេលាកំណត់ជាក់ស្ដែងនឹងមានលទ្ធផលជាក់លាក់ នឹងមានលទ្ធផលជាអនុសាសន៍ដែលរដ្ឋសមាជិកនានាផ្ដល់ទៅរដ្ឋដែលត្រូវបានពិនិត្យ។
លោកថា UPR គឺជាដំណើរការតែមួយគត់ដែលពាក់ព័ន្ធនឹងការពិនិត្យរបាយការណ៍នៃកំណត់ត្រាសិទ្ធិមនុស្សរបស់រដ្ឋជាសមាជិកអង្គការសហប្រជាជាតិទាំងអស់។ UPR គឺជាដំណើរការមួយដែលប្រឹងប្រែងព្យាយាមសម្រេចដោយរដ្ឋ ដោយមានការជួយជ្រោមជ្រែងពីក្រុមប្រឹក្សាសិទ្ធិមនុស្ស ដែលផ្តល់នូវឱកាសសម្រាប់រដ្ឋនីមួយៗដើម្បីប្រកាសពីសកម្មភាពអ្វីខ្លះដែលរដ្ឋទាំងនោះបានធ្វើ ដើម្បីកែលម្អស្ថានភាពសិទ្ធិមនុស្សនៅក្នុងប្រទេសរបស់ខ្លួន និងដើម្បីបំពេញកាតព្វកិច្ចសិទ្ធិមនុស្សរបស់គេផងដែរ។ ក្នុងនាមជាផ្នែកសំខាន់មួយរបស់ក្រុមប្រឹក្សានេះ UPR ត្រូវបានរចនាឡើងដើម្បីធានាការប្រព្រឹត្តដោយស្មើគ្នាសម្រាប់ប្រទេសនីមួយៗនៅពេលដែលស្ថានភាពសិទិ្ធមនុស្សរបស់ប្រទេសទាំងនោះត្រូវបានវាយតម្លៃ។
លោកបន្ថែមថា យន្តការនេះមានគោលបំណងបង្កើន និងគាំទ្រឲ្យបានឆាប់រហ័សលើការងារលើកកម្ពស់និងការពារសិទ្ធិមនុស្សនៅមូលដ្ឋាន។ នៅខែកក្កដាឆ្នាំ ២០១៩ រដ្ឋាភិបាលកម្ពុជាបានទទួលយកជាផ្លូវការនូវអនុសាសន៍ចំនួន១៧៣ ក្នុងចំណោមអនុសាសន៍ចំនួន១៩៨ ដែលកម្ពុជាទទួលបានពីប្រទេសចំនួន៧១ ក្នុងការត្រួតពិនិត្យលើកទី 3 និងកត់សម្គាល់អនុសាសន៍ដែលនៅសល់ចំនួន២៥។
ប្រធានក្រុមការងារ សរសេររបាយការណ៍ UPR បន្ថែមថា ពេលជាង២ ឆ្នាំមកនេះ ដែររាជរដ្ឋាភិបាលទទួលយកអនុសាសន៍ចំនួន ១៧៣ នៃUPR និងជាចំណុចពាក់កណ្ដាលនៃ UPR ។ នៅដំណាក់កាលពាក់កណ្ដាលនៃវដ្តនេះ រដ្ឋសមាជិកត្រូវបានលើកទឹកចិត្តឲ្យផ្ញើរបាយការណ៍ ជាលក្ខណៈស្ម័គ្រចិត្តទៅឱ្យក្រុមប្រឹក្សាសិទ្ធិមនុស្ស ដើម្បីរាយការណ៍ពីដំណើរការនៃការអនុវត្តអនុសាសន៍នានា។ រដ្ឋាភិបាលកម្ពុជា បានសរសេររបាយការណ៍ ដើម្បីវាយតម្លៃដំណើរការអនុវត្តអនុសាសន៍ដែលទទួលបានពីការត្រួតពិនិត្យ UPRលើកទី ៣។
សូមបញ្ជាក់ថា កិច្ចពិគ្រោះយោបល់នេះ មានការអញ្ជើញចូលរួមពីតំណាងក្រសួង ស្ថាប័ន ពាក់ព័ន្ធ ចំនួន ១៨ក្រសួង/ស្ថាប័ន ឯកអគ្គរដ្ឋទូត អគ្គរាជទូតនានា ដៃគូអភិវឌ្ឍន៍ ព្រមទាំងអង្គការសង្គមស៊ីវិលជាច្រើនទៀត៕
