កម្ពុជា នឹងមានអតិផរណា រយៈពេលខ្លី និងមធ្យម ដោយសារតម្លៃប្រេងឥន្ធនៈឡើងថ្លៃ កពីសង្គ្រាមនៅអ៊ុយក្រែន
ភ្នំពេញ៖ កម្ពុជា នឹងមានអតិផរណា (ទំនិញ ឬសេវាឡើងថ្លៃ រីឯប្រាក់ចុះថោក )រយៈពេលខ្លី និងមធ្យម ដោយសារតម្លៃប្រេងឥន្ធនៈឡើងថ្លៃដែលបណ្តាលមកពីសង្គ្រាមនៅប្រទេសអ៊ុយក្រែន។ នេះជាការលើកឡើងរបស់លោកស្រី ជា សិរី អគ្គនាយកធនាគារជាតិនៃកម្ពុជា។
ថ្លែងក្នុងទិវាប្រាក់រៀល ខួបលើកទី៤២នៃការដាក់ឱ្យចរាចរប្រាក់រៀលឡើងវិញកាលពីពេលថ្មីៗនេះ លោកស្រី ជា សិរី បានបន្តថា អតិផរណានៅឆ្នាំ២០២២នេះ អាចនឹងឡើងខ្ពស់ជាងការព្យាករណ៍ ដែលមានកម្រិតប្រមាណ ២,៦ភាគរយ ខណៈឆ្នាំ ២០២១ មានអតិផរណាប្រមាណ២,៩ភាគរយ។
លោកស្រីបានបន្តទៀតថា ជាទូទៅការព្យាករណ៍អតិផរណាឆ្នាំ២០២២គឺយើងបានធ្វើការព្យាករណ៍នៅចុងឆ្នាំ២០២១។ប៉ុន្តែវាគ្រាន់តែជាការព្យាករណ៍មិនមែនជាតួលេខជាក់លាក់ទេហើយក្រោយពីព្យាករណ៍ហើយក៏ចាប់ផ្តើមមានផ្ទុះសង្គ្រាមនៅអ៊ុក្រែននិងរុស្សី។
លោកស្រីបានបន្ថែមថា«ការព្យាករណ៍នឹងមានការប្រែប្រួលហើយអ្វីដែលយើងកំពុងតាមដានមើលហ្នឹងថាតើការឡើ្ថងថ្លៃប្រេងឥន្ធនៈវាប៉ះពាល់ដល់អតិផរណាយើងយ៉ាងដូចម្តេចព្រោះថាប្រេងប្រើជាមធ្យោបាយដឹកជញ្ជួនទំនិញជាដើម ។អីចឹងបើការណាប្រេងឡើងថ្លៃតម្លៃម្លូបអាហារក៏អាចឡើងថ្លៃដែរព្រោះការដឹកជញ្ជួនទំនិញយកមកលក់ត្រូវការប្រេង»។
លោកស្រី ជាសិរី បានបន្ថែមទៀតថា «ឥឡូងនេះយើងនៅអត់ទាន់បានធ្វើការគិតគូឡើងវិញថានឹងកើនអតិផរណាប៉ុន្មានទេប៉ុន្តែគ្រាន់តែដឹងថាអតិផរណាអាចនឹងកើនឡើងខ្ពស់ជាងការព្យាករណ៍ទុកកន្លងមក»។
លោកស្រីបានឱ្យដឹងទៀតថា ធនាគារជាតិបានធ្វើការតាមដានជាប្រចាំទៅលើតម្លៃម្ហូបអាហារនិងទំនិញទូទៅមានការប្រែប្រួលអ្វីខ្លះទាំងនៅភ្នំពេញនិងខេត្ត។បន្ទាបើមកយើងនឹងពិភាក្សាជាមួយវិទ្យាស្ថានស្ថិតិជាតិនិងក្រសួងសរដ្ឋកិច្ចនិងហិរញ្ញវត្ថុដែលអាចមានទិន្នន័យបន្ថែមពីលើអ្វីដែលយើងមានដើម្បីអាចទាញយកលទ្ធផលមួយដែលអាចប្រើប្រាស់បាន។
លោកស្រី ជាសិរី បានបញ្ជាក់ទៀតថា«ផលប៉ះពាល់សេដ្ឋកិច្ចកម្ពុជាពីសង្គ្រាមនៅអ៊ុយក្រែនយើងពិបាកនឹងការព្យាករណ៍តែអ្វីដែលដឹងគឺតម្លៃប្រេងឡើងថ្លៃអតិផរណានឹងកើនឡើងខ្ពស់។សង្ឃឹមថាក្រោយពីវិបត្តិកូវីដនេះទៅកម្ពុជានឹងទទួលបានភ្ញៀវទេសចរច្រើន។ប៉ុន្តែជាអ្វីដែលជាចំណុចអវិជ្ជមានដោយសារប្រេងឡើងថ្លៃដែលធ្វើឱ្យមធ្យោបាយធ្វើដំណើរសម្រាប់ដឹកភ្ញៀវទេសចរក៏កើនឡើងដែរ»។
លោកស្រីបានឱ្យដឹងទៀតថាកម្ពុជាអាចនឹងមានអតិផរណាឡើងខ្ពស់រយៈពេលខ្លីនិងមធ្យមប៉ុន្តែអាចចុងឆ្នាំ២០២២នេះអាចត្រឡប់មកអ្វីតាមការព្យាករណ៍វិញក៏ថា។ប៉ុន្តែវាស្ថិតនៅមិនច្បាស់នៅឡើយដោយសារមិនដឹងថាសង្គ្រាមនៅអ៊ុយក្រែននឹងបញ្ចប់នៅពេលណា៕
