ស្លុតចិត្ត! តារាជើងចាស់ថៃលោក Sorapong បានទទួលមរណភាពហើយ ក្នុងវ័យ ៧១ ឆ្នាំ….
ពិតជាធ្វើឱ្យមហាជនអ្នកគាំទ្រមានសេចក្ដីរំជួលចិត្តយ៉ាងខ្លាំង ដោយពេលនេះតារាសម្ដែងជើងចាស់ថៃ ដ៏មានប្រជាប្រិយភាពលោក Sorapong Chantree បានទទួលអនិច្ចកម្មហើយ ក្នុងជន្មាយុ ៧១ ឆ្នាំ ដោយសារជំងឺមហារីកសួត។
អស់ពេលមកមួយរយៈធំហើយ ដែលតារាសម្ដែងប្រុសជើងចាស់រូបនេះ បានចូលមន្ទីរពេទ្យសម្រាកព្យាបាល តែដោយសារតែស្ថានភាពជំងឺធ្ងន់ធ្ងរពេក ទើបក្រុមគ្រូពេទ្យពុំអាចជួយសង្គ្រោះ បានជាអកុសលនៅល្ងាចថ្ងៃទី ១០ ខែមីនា ឆ្នាំ ២០២២ នេះ លោក Sorapong Chantree ក៏បានលាចាកលោកទៅ។
ជាមួយនឹងការបាត់បងនូវសិល្បករឆ្នើម ពោរពេញដោយទេព្យកោសល្យនេះ ពិតជាធ្វើឱ្យមហាជនក្នុងនឹងក្រៅស្រុក សម្ដែងការសោកស្តាយអាឡោះអាល័យគ្រប់ៗគ្នា។ ក្នុងនោះដែរ គេក៏ឃើញថាមានមហាជន និង មិត្តៗសិល្បករថៃជាច្រើន សម្ដែងការសោកស្តាយព្រមទាំងបង្ហោះសាររំលែកទុក្ខដល់ក្រុមគ្រួសារនៃសពផង៕
