កម្ពុជាតូចពិតតែមានបេះដូងធំទូលាយ!! កម្ពុជា ជូនអំណោយ រថយន្តដឹកវ៉ាក់សាំង ១០ គ្រឿង ជូនមិត្តឡាវ និង ដឹកជូន ៣ ថ្ងៃទៀត
ក្រសួងសុខាភិបាល នៅថ្ងៃទី ០៩ ខែមីនា ឆ្នាំ ២០២២ នេះ ក្រសួងសុខាភិបាល នៃព្រះរាជាណាចក្រកម្ពុជា បានចេញសេចក្តីជូនព័ត៌មាន ស្តីពីពិធីប្រគល់-ទទួល រថយន្តដឹកវាក់សាំងចំនួន ១០ គ្រឿង ដែលជាអំណោយសប្បុរសធម៌ របស់ព្រះរាជាណាចក្រកម្ពុជា ប្រគល់ជូនសាធារណរដ្ឋប្រជាធិបតេយ្យប្រជាមានិតឡាវ។
តាមរយៈការផ្ដល់ជូននេះ នៅថ្ងៃទី ១២ ខែមីនា ឆ្នាំ ២០២២ ខាងមុខ លោកជំទាវវេជ្ជបណ្ឌិត ឱ វណ្ណឌីន ប្រធានគណៈកម្មការចំពោះកិច្ចចាក់វ៉ាក់សាំងកូវីដ-១៩ ក្នុងក្របខណ្ឌទូទាំងប្រទេស និងជាតំណាងដ៏ខ្ពង់ខ្ពស់របស់ សម្តេចតេជោ នឹងនាំយក ជំនួយរថយន្តដឹកវ៉ាក់សាំងចំនួន ១០ គ្រឿង របស់រាជរដ្ឋាភិបាល និងប្រជាជនកម្ពុជា ទៅប្រគល់ជូនរដ្ឋាភិបាល និង ប្រជាជននៃសាធារណរដ្ឋប្រជាធិបតេយ្យប្រជាមានិតឡាវ នៅច្រកព្រំដែនអន្តរជាតិត្រពាំងក្រៀល ស្ថិតនៅក្នុង ខេត្តស្ទឹងត្រែង ជាប់ព្រំដែនខេត្តចម្ប៉ាស័កនៃប្រទេសឡាវ។
ក្នុងនោះ ក្រសួងបានគូសបញ្ជាក់ឱ្យដឹងផងដែរថា ការសម្រេចផ្ដល់រថយន្តដឹកវ៉ាក់សាំងនេះ គឺជាការបង្ហាញនូវការយកចិត្តទុកដាក់ខ្ពស់បំផុត របស់សម្ដេចតេជោ ចំពោះសុខភាព និងសុខុមាលភាពរបស់ប្រជាជនឡាវ ក្នុងនាមជាប្រទេសជិត ខាងភូមិផងរបងជាមួយគ្នា ក៏ដូចជាការពង្រឹងនូវកិច្ចសហប្រតិបត្តិការទ្វេភាគី និងជាកាយវិការមនុស្សធម៌ ប្រកបដោយ បេះដូងដ៏ល្អប្រពៃ ពិតប្រាកដក្នុងន័យ «កម្ពុជាជាប្រទេសតូចតាចតែមាន បេះដូងធំទូលាយ»៕
