អ្នកនាំពាក្យអាជ្ញាធរជាតិអប្សរា មិនគាំទ្រចំពោះការយកទង់ជាតិខ្មែរ ទៅច្នៃធ្វើជាម៉ូដសម្លៀកបំពាក់
ភ្នំពេញ៖ បន្ទាប់ពីអ្នកចំរៀង និងអ្នកសំដែងជាច្រើន បានស្លៀកពាក់ឈុតទង់ជាតិ ក្នុងម៉ូដបុរាណ ហើយបានទៅថតនៅប្រាសាទអង្គរវត្ត និងបង្ហោះព្រោងព្រាតតាមហ្វេសប៊ុក អ្នកនាំពាក្យអាជ្ញាធរជាតិអប្សរា បានប្រកាស មិនគាំទ្រចំពោះការយកទង់ជាតិខ្មែរ ទៅច្នៃធ្វើជាម៉ូដ កាត់ជាសម្លៀកបំពាក់ឡើយ។
លោក ឡុង កុសល អ្នកនាំពាក្យអាជ្ញាជាតិអប្សរាតាមរយៈទំព័រហ្វេសប៊ុកផ្លូវការរបស់អាជ្ញាធរជាតិអប្សរា នៅថ្ងៃទី៨ ខែមីនា ឆ្នាំ២០២២ នេះ ថា ការយកទង់ជាតិខ្មែរ ដែលជានិមិត្តរូបរបស់ជាតិខ្មែរ មកច្នៃជាម៉ូដសំលៀកបំពាក់ គឺជាការមិនសមរម្យ ព្រោះគេតែងតែផ្តល់តម្លៃដល់ទង់ជាតិ គឺទង់ជាតិ តែងតែត្រូវបានបង្ហូតឡើងលើ ដោយអមជាមួយនូវការច្រៀង និងភ្លេងជាតិ។ ទង់ជាតិ គឺជានិមិត្តរូបជាតិ។
លោក ឡុង កុសល បន្តថា ទង់ជាតិ ត្រូវបានគោរព ដោយស្មារតីស្នេហាជាតិ ស្រលាញ់ទឹកដី ជាតិមាតុភូមិ។ ម្យ៉ាងទៀត ទង់ជាតិ ក៏ត្រូវបានផ្ដល់ជាមហាកិត្តិយសសម្រាប់វីរជន យុទ្ធជន យុទ្ធនារី ដែលបានពលីជីវិតនៅពេលបានចេញច្បាំងការពារជាតិ ទឹកដី ឬទៅបំពេញបេសកកម្មមនុស្សធម៌នៅក្រៅ គឺជាតិតែងដឹងគុណ និងយកទង់ជាតិទៅគ្រងពីលើ ដើម្បីសម្តែងការគោរព និងដឹងគុណ។
លោកថា ការយករូបភាពទង់ជាតិមកធ្វើជាសំលៀកបំពាក់ គឺមិនសមរម្យទេ ព្រោះការយកទង់ជាតិខ្មែរ ទៅច្នៃធ្វើជាម៉ូដសម្លៀកបំពាក់ អាចជាការប្រមាថ ដូចជា នៅពេលដែលគេស្លៀកពាក់ គឺគេហាក់បីដូចជាបានអង្គុយលើទង់តំណាងឱ្យជាតិទាំងមូល ឬក៏នៅពេលដែលសម្លៀកបំពាក់នោះ ប្រឡាក់ អ្នកខ្លះ មិនបានយកទៅបោកសម្អាតទេ បែរជាយកទៅទុកចោល ជាដើម។
លោក ឡុង កុសល បន្ថែមថា ប្រសិនបើចង់បង្ហាញឱ្យឃើញពីទឹកចិត្តស្រឡាញ់ជាតិពិតមែននោះ គឺនៅពេលមកទស្សនាតំបន់អង្គរ ដែលជាសម្បត្តិវប្បធម៌ និងបេតិកភណ្ឌរបស់មនុស្សជាតិ សូមជួយចូលរួមការពារបរិស្ថាន កុំបោះសំរាមចោល នៅក្នុងរមណីយដ្ឋានអង្គរ ត្រូវធ្វើដំណើរថ្មើរជើង ចូលតំបន់អង្គរ ទៅតាមផ្លូវ ដែលបានរៀបចំជូន កុំដើរជាន់ស្មៅ ដែលនាំឱ្យខូចសោភ័ណភាព កុំយកអាហារទៅទទួលទាននៅទីតាំងហាមឃាត់ ក្នុងតំបន់បេតិកភណ្ឌ កុំទិញលក់ដី និងសង់សំណង់ខុសច្បាប់ នៅក្នុងតំបន់ការពារ និងគួរចតយានជំនិះ នៅកន្លែងចំណត ដើម្បីកុំឱ្យខូចខាតសណ្ដាប់ធ្នាប់សាធារណៈ និងស្ទះផ្លូវជាដើម។ ទាំងនេះ នឹងនាំមកនូវមោទកភាពដល់ជាតិខ្មែរដែរ៕
