មេបក្សយុវជនកម្ពុជា អំពាវនាវអាជ្ញាធរមូលដ្ឋាន សូមកុំគំរាមកំហែងបេក្ខជនបក្សលោកដែលឈរឈ្មោះជាក្រុមប្រឹក្សា ឃុំ-សង្កាត់
ភ្នំពេញ៖ ប្រធានគណបក្សយុវជនកម្ពុជា អំពាវនាវដល់អាជ្ញាធរនៅតាមមូលដ្ឋាន ជាពិសេសលោកមេឃុំ មេភូមិ អនុភូមិ ប្រជាការពារភូមិ សូមកុំទៅគំរាមកំហែងបេក្ខជនដែលឈរឈ្មោះជាក្រុមប្រឹក្សា ឃុំ-សង្កាត់ឲ្យគណបក្សរបស់លោក។
តាមរយៈទំព័រហ្វេសបុកផ្លូវការរបស់លោកនារសៀលថ្ងៃទី៧ មិនា នេះ លោកពេជ្រ ស្រស់ បានអោយដឹងថា ខ្ញុំ ពេជ្រ ស្រស់ ក្នុងនាមប្រធានគណបក្សយុវជនកម្ពុជាសូមអំពាវនាវដល់អាជ្ញាធរនៅតាមមូលដ្ឋាន ជាពិសេសលោកមេឃុំ មេភូមិ អនុភូមិ ប្រជាការពារភូមិកុំទៅគំរាមកំហែងបេក្ខជនដែលឈរឈ្មោះក្រុមប្រឹក្សា ឃុំ-សង្កាត់ឲ្យគណបក្សយុវជនកម្ពុជាអី ពីព្រោះទង្វើអស់លោក គឺបានដើរផ្ទុយពី រដ្ឋធម្មនុញ្ញកម្ពុជា ដែលនាំឲ្យលំហរ នៃការធ្វើនយោបាយមិនស្មើភាពគ្នាផងដែរ។
ប្រធានបក្សយុវជនរូបនេះ បន្ថែមថា ក្នុងន័យនេះសូមភាគីពាក់ពន្ធ័ នៃកិច្ចការបោះឆ្នោតនៅកម្ពុជា ជួយអន្តរាគមន៍ដល់ថ្នាក់ក្រោម ដើម្បីបញ្ឈប់នូវសកម្មភាពគំរាមកំហែងនេះផងចុះ ដើម្បីឲ្យការបោះឆ្នោតប្រកបទៅដោយរលូន និងស្មើភាពគ្នា។
សូមបញ្ជាក់ផងដែរថា ការបោះឆ្នោតជ្រើសរើសក្រុមប្រឹក្សាឃុំសង្កាត់ អាណត្តិទី៥ ឆ្នាំ២០២២ នឹងប្រព្រឹត្តទៅនាថ្ងៃទី៥ ខែមិថុនាឡើយ។ ក្នុងនោះគ.ជ.ប ទទួលពាក្យចុះបញ្ជីបេក្ខជនរបស់គណបក្សនយោបាយ សម្រាប់ឈរឈ្មោះបោះឆ្នោតឃុំសង្កាត់ រយៈពេល ៣ថ្ងៃ ចាប់ពីថ្ងៃទី៤-៦ ខែមីនា ឆ្នាំ២០២២។ គិតត្រឹមថ្ងៃទី៥ ខែមីនា មានគណបក្សនយោបាយ ចំនួន ១៧គណបក្សហើយ បានដាក់បេក្ខជន ចូលរួមការបោះឆ្នោតឃុំសង្កាត់ នាថ្ងៃទី៥មិថុនា។ ក្នុងនោះ មានតែគណបក្សប្រជាជនកម្ពុជាប៉ុណ្ណោះ ដែលបានដាក់បេក្ខជន ឈរឈ្មោះ នៅគ្រប់ ១៦៥២ឃុំសង្កាត់ នៅទូទាំងប្រទេស៕
