ខ្លោចចិត្តណាស់! ក្រោយឃើញទិដ្ឋភាពពលរដ្ឋអាល្លឺម៉ង់រាប់ពាន់នាក់ ចេញមកទទួលឱ្យជនភៀសខ្លួនអ៊ុយក្រែន ស្នាក់នៅផ្ទះជាមួយ
នៅស្ថានីយ៍រថភ្លើងកណ្តាលទីក្រុងប៊ែកឡាំង រថភ្លើងដែលធ្វើដំណើរមកពីទិសខាងកើតដឹកជនភៀសខ្លួនរាប់ពាន់នាក់ជារៀងរាល់ថ្ងៃ ភាគច្រើនជាមនុស្សចាស់ ស្ត្រី និង កុមារ (បុរសៗត្រូវធ្វើទ័ព) ដែលភៀសខ្លួនចេញពីសង្រ្គាមលោក វ្ល៉ាឌីមៀ ពូទីន នៅអ៊ុយក្រែន កំពុងផ្ទុះកក្រើកព័ត៌មានដែលធ្វើឲ្យពិភពលោករំជួលចិត្ត។
ថ្មីៗនេះគោលការណ៍សប្បុរសធម៌បានអនុម័តអភ័យឯកសិទ្ធពិសេសសម្រាប់ជនជាតិអ៊ុយក្រែន អ្នកដែលចង់បន្តដំណើរទៅគ្រប់ទីកន្លែងនឹងទទួលបានសំបុត្ររថភ្លើងដោយឥតគិតថ្លៃទៅគ្រប់ទីកន្លែងក្នុងទ្វីបអឺរ៉ុប។ អស់អ្នកដែលមិនមានទីស្នាក់អាស្រ័យនឹង ត្រូវនាំចុះទៅកាន់សាលដាក់អ្នកដំណើរដែលមានទីតាំងក្នុងរូងភ្នំនៃប្រទេសអាល្លឺម៉ង់់ដើម្បីការពារសន្តិសុខពួកគេ។
អ្វីដែលពិភពលោករកឃើញ គឺជាប្រតិបត្តិការដ៏ធំមួយដើម្បីស្វាគមន៍ជនជាតិអ៊ុយក្រែននោះគឺ អាហារ និង ភេសជ្ជៈគ្រប់ប្រភេទត្រូវបានចែកជូន រួមជាមួយនឹងស៊ីមកាតសម្រាប់ទូរស័ព្ទទំនាក់ទំនងគ្នា ហើយនៅទីនោះមានក្រុមគ្រូពេទ្យ អ្នកបកប្រែ អ្នកស្ម័គ្រចិត្តជាយុវជនយុវនារីជាច្រើនមកពីជុំវិញតំបន់អឺរ៉ុប ដើម្បីជួយសម្រួលការស្នាក់នៅបណ្តោះអាសន្នរបស់អ្នកភៀសខ្លួនទាំងនោះ។
កាន់តែគួរឲ្យរំភើបខ្លាំងស្ទើរតែស្រក់ទឹកភ្នែកទៀតនោះ ហ្វូងមនុស្សរាប់រយគ្រួសារជាជនជាតិអាឡឺម៉ង់កំពុងឈរនៅទីនោះផងដែរជាមួយនឹងស្នាមញញឹម ដើម្បីផ្តល់កន្លែងស្នាក់នៅដល់ជនភៀសខ្លួនទាំងនោះ។ ពួកគេបានកាន់ផ្លាកសញ្ញាធ្វើពីក្រដាសសរសេរអក្សរថា៖ «ផ្ទះខ្ញុំអាចដាក់បានមនុស្សពីរនាក់!»
« ផ្ទះយើងមានបន្ទប់ធំមួយ សម្រាប់មនុស្សបីនាក់។ ក្មេងៗក៏ស្វាគមន៍ដែរ! ដរាបណាអ្នកចង់បាន»
« ផ្ទះខ្ញុំមានទទួលស្ត្រី និង កូនតូចៗ»
អ្នកម៉ាក់ម្នាក់ឈរបីកូនស្រី ជាមួយនឹងដៃកាន់ផ្លាកសញ្ញាសរសេរថា៖ «ម៉ាក់ម្នាក់ កូនពីរ ៤ ដល់ ៦សប្ដាហ៍» ។ គួរឱ្យដឹងថា អ្នកភៀសខ្លួនទាំងអស់អាចរើសអ្នកដែលខ្លួនចង់ទៅនៅជាមួយ ដោយពួកគេមានរថយន្តរង់ចាំអ្នករួចជាស្រេច ជាមួយនឹងទិដ្ឋភាពកងរំពងដោយភាពកក់ក្តៅ និង សំឡេងមនុស្សធម៌ ការឲបអរគុណដោយទឹកភ្នែកហូរពីស្ត្រីជនភៀសខ្លួន។ កាន់តែរំជួលចិត្តទៀតនោះ វេលារសៀលថ្ងៃទី៤ ខែមិនា នេះ មានការទះដៃអបអរជាខ្លាំង ខណៈបុរសដែលប្រើមេក្រូហ្វូនបន្លឺពីស្ថានីយសួរថា៖ «តើមាននរណាម្នាក់អាចយកគ្រួសារមានគ្នា ១៣នាក់ បានទេ?» ហើយគ្រានោះមានបុរសម្នាក់បោះជំហានទៅមុខព្រមទទួល ហើយសំឡេងកងរំពងនៃមហាជនហ៊ោរទះដៃអបអរពេញស្ថានីយ៍រថភ្លើង។ វាជាទិដ្ឋភាពនៃសកម្មភាពមនុស្សធម៌គ្មានព្រំដែនដ៏គួរឲ្យរំភើប និង ចងចាំក្នុងប្រវត្តិសាស្ត្រពិភពលោក៕
ស្រាវជ្រាវ និង ចងក្រងពី៖ BBC News, Teller Reports.com
