កាន់តែក្ដៅ! ពេលនេះក្រុមមិត្ត និង អ្នកចាត់ការ Tangmo ត្រូវបានប៉ូលិសបើកការសាកសួរចម្លើយហើយ…
ខណៈនេះករណីរបាត់ខ្លួននៅទន្លេចៅផាយ៉ារបស់តារាសម្ដែងស្រី Tangmo ហាក់កំពុងតែកក្រើកខ្លាំងនៅលើបណ្ដាញសង្គម។ ចាប់តាំងតែវេលាម៉ោង ២២ និង ៤០ នាទីយប់ថ្ងៃទី ២៤ ខែកុម្ភៈ ឆ្នាំ ២០២២ មកទល់វេលាស្មើនេះក្រុមអ្នកជួយសង្គ្រោះពុំទាន់រកឃើញដំរួយអ្វីពីការបាត់ខ្លួនរបស់តារាស្រី Tangmo ឡើយ។
ទោះបីមានផលលំបាកជាមួយនឹងខ្សែទឹកឡើងយ៉ាងគំហុកក៏អាជ្ញាធរ និង ក្រុមកម្លាំងសង្គ្រោះនៅតែព្យាយាយស្វែងរកយ៉ាងសស្រាក់សស្រាំដែរ។ ដោយឡែកបើងាកទៅមើលក្រុមប៉ូលិសស៊ើបអង្កេតឯណោះវិញ ពេលនេះក៏កំពុងដុតដៃដុតជើងដូចគ្នា
ដោយក្រុមប៉ូលិសបានព្យាយាមទាក់ទងមិត្តភក្តិរបស់តារាស្រី Tangmo ដែលនៅលើទូកនោះដើម្បីមកសាកសួរ តែពួកគេទាំងអស់ហាក់មិនព្រមចូលខ្លួនឱ្យក្រុមប៉ូលិសធ្វើឡើយ ដែលហេតុនាំឱ្យការងារនេះមានភាពយឺតយ៉ាវ។
ព្រោះតែមានការបដិសេធពីក្រុមមិត្តភក្តិរបស់តារាស្រី Tangmo ប៉ូលិសក៏បាននិយាយថា នឹងទុកវេលាឱ្យត្រឹមថ្ងៃនេះបើមិនដូចច្នោះក្រុមប៉ូលិសនឹងចេញដីកាកោះហៅជាមិនខានពីបទប្រមាថមិនព្រមសហការជាមួយប៉ូលិស។
ក្រោយប្រកាសដូចនោះ ស្រាប់តែវេលាម៉ោង ១៩ និង ៣៧ នាទីមុននេះ គេក៏ឃើញមិត្តភក្តិ ៣ នាក់របស់តារាស្រី Tangmo រួមនឹងអ្នកចាត់ការផ្ទាល់ខ្លួន ព្រមទាំងអ្នកបើកទូកបានយល់ព្រមចូលខ្លួនមកបំភ្លឺហើយជុំវិញរឿងរ៉ាវដែលកើតឡើង។
ជាមួយនឹងការចូលបំភ្លឺរឿងហេតុគេក៏បានបែងចែកបន្ទប់ផ្សេងៗគ្នាផងដែរ ដើម្បីសួរនាំពីហេតុការណ៍របស់តារាស្រី Tangmo ។ ជុំវិញរឿងរ៉ាវបន្តទៅជាយ៉ាងណាពេលនេះគេពុំទាន់អាចដឹងឡើយដរាបការសាកសួរពុំទាន់បានបញ្ចប់ ដូចនេះមានតែរង់ចាំតាមដានបន្ត៕ ប្រភព៖ Nation Online
