ផ្អើលហើយ! មិនទាន់រក Tangmo ឃើញផង ធ្លាយរឿងមិត្តជិះទូកជាមួយរកមេធាវីទុកតវ៉ាក្តីមុនបាត់
រឿងរ៉ាវតារាស្រី Tangmo បាន និង កំពុងផ្ទុះនៅលើបណ្តាញសាព័ត៌មានគ្រប់ទិសទី ពីហេតុការណ៍នៃការបាត់ខ្លួនរបស់នាងធ្លាក់ចូលទៅក្នុងទន្លេ ខណៈនាងកម្សាន្តនៅលើទូលមួយជាមួយក្រុមមិត្តភក្តិជិតស្និទ្ធរបស់នាង ៥ នាក់ទៀតកាលពីយប់ថ្ងៃទី ២៤ ខែកុម្ភៈ ឆ្នាំ ២០២២ កន្លងទៅនេះ។
បើតាមរយៈព័ត៌មានបឋម បានឱ្យដឹងថា តារាស្រី Tangmo បានរអិលធ្លាក់ចូលទឹកពេលព្យាយាមឈរថតរូប ស្របពេលដែលទូកគ្រលែង ហើយបានបាត់ខ្លួនរហូតមកទល់ពេលនេះរកមិនទាន់ឃើញ មិនដឹងស្លាប់ ឬ រស់។
ដោយឡែក អ្វីដែលមហាជនកំពុងតែផ្ទុះការសង្ស័យបំផុតជុំវិញរឿងរ៉ាវមួយនេះនោះ គឺខណៈពេលកើតហេតុ និង ក្នុងពេលដែលក្រុមជំនាញកំពុងតែរុករកតារាស្រី Tangmo បែរជាបាត់វត្តមានមិត្តរួមទូកជាមួយនាងគ្មានដំណឹងសូន្យឈឹងទៅវិញ។
លើសពីនេះទៅទៀត អ្វីដែលកាន់តែធ្វើឱ្យមហាជនផ្ទុះការវែកញែកទៅទៀតនោះ នៅយប់ថ្ងៃទី ២៥ ខែកុម្ភៈ ឆ្នាំ ២០២២ នេះ បែរជាលេចឮមកថា លោក Tum ដែលជាមេធាវីល្បីឈ្មោះម្នាក់បានទម្លាយប្រាប់ទៅដល់សារព័ត៌មានថា នៅក្នុងថ្ងៃកើតហេតុ មិត្តភក្តិរបស់តារាស្រី Tangmo បានទាក់ទងមកលោក ដើម្បីសុំឱ្យជួយដំណើរការក្តីជូនពួកគេជុំវិញរឿងរ៉ាវមួយនេះ តែលោកសូមបញ្ជាក់នៅត្រង់នេះថា លោកមិនបានចូលខ្លួនជាមេធាវីសម្រាប់ពួកគេឡើយ ហើយលោកជ្រាបមកថា អ្នកគ្រប់គ្រងរបស់ Tangmo បានត្រៀមក្រុមមេធាវីមុនលោកទៅទៀត។
យ៉ាងណាមិញ ជុំវិញរឿងរ៉ាវមួយនេះ បានធ្វើឱ្យមហាជនផ្ទុះការវែកញែកស្ទើរបែកបណ្តាញសង្គមនៅប្រទេសថៃ ខណៈមិនទាន់រកឃើញតារាស្រី Tangmo ផង ហេតុអ្វីក្រុមមិត្តបែរជាលួចត្រៀមមេធាវីទៅវិញ៕
