សង្គ្រាម ២ ថ្ងៃមកនេះ រុស្ស៊ី កម្ទេចសព្វាវុធយោធា អ៊ុយក្រែន រាប់សិបគ្រឿង

ក្រុងគៀវ៖ រថយន្តយោធាអ៊ុយក្រែនចំនួន ៤១ គ្រឿង រថក្រោះ និងរថពាសដែកប្រយុទ្ធ ១៨ គ្រឿង ប្រព័ន្ធរ៉ុកកែត ៧ គ្រឿង និងទូកប្រយុទ្ធចំនួន ៥ គ្រឿងត្រូវបានបំផ្លាញដោយកងកម្លាំងរុស្ស៊ី ។ នេះបើយោងតាមក្រសួងការពារជាតិរបស់រុស្ស៊ី។

អ្នកនាំពាក្យយោធារុស្ស៊ីលោក Igor Konashenkov បាននិយាយនៅថ្ងៃសុក្រនេះថា ទាហានឆ័ត្រយោងរុស្ស៊ីក៏បានកាន់កាប់តំបន់នៃរោងចក្រថាមពលនុយក្លេអ៊ែរ Chernobyl ដែលមានទីតាំងប្រហែល ១០០ គីឡូម៉ែត្រពីរដ្ឋធានី គៀវ របស់អ៊ុយក្រែន។

ក្រសួងការពារជាតិក៏បានរាយការណ៍ផងដែរថា កងពលតូចទី ៣៦ នៃកងកម្លាំងអ៊ុយក្រែន រួមជាមួយទាហាន ៨២ នាក់នៅលើកោះពស់ក្នុងសមុទ្រខ្មៅបានលើកទង់ ស ចុះចាញ់ ខណៈឆ្មាំព្រំដែន ១៣ នាក់លើកោះនេះត្រូវបានសម្លាប់ និង ១៣៧ នាក់បានស្លាប់នៅទូទាំងប្រទេស៕