ប្រធានាធិបតីអ៊ុយក្រែន បញ្ជាអោយកេណ្ឌទ័ព ដើម្បីទប់ទល់នឹងការឈ្លានពានរបស់រុស្ស៊ី
ក្រុងគៀវ៖ ប្រធានាធិបតីអ៊ុយក្រែនលោក វ៉ូឡូឌីមៀរ ហ្សេឡេនស្គី កាលពីយប់ថ្ងៃព្រហស្បតិ៍បានចេញបញ្ជាអោយកេណ្ឌទ័ព ដើម្បីទប់ទល់នឹងការឈ្លានពានរបស់រុស្ស៊ី។ លោកបានដឹកនាំកិច្ចប្រជុំពួកឧត្តមសេនីយ៍ក្នុងការកំណត់ចំនួនមនុស្សសំរាប់សេវាកងទ័ពនិងចំនួនទាហានបំរុង ព្រមទាំងការបញ្ជាអោយបង្ហាញខ្លួនចូលបំរើកងទ័ព។
លោកប្រធានាធិបតីបាននិយាយថា ជនស៊ីវិលនិងទាហានអ៊ុយក្រែន១៣៧នាក់ត្រូវបានកងកម្លាំងឈ្លានពានសម្លាប់និងរាប់ពាន់នាក់រងរបួសតាំងពីមុនមកនៅក្នុងប្រទេសលោក។
លោកថា ទោះជារុស្ស៊ីអះអាងថា គេវាយប្រហារតែគោលដៅយោធា តែទីតាំងស៊ីវិលក៏រងការវាយប្រហារ។«ពួកគេសម្លាប់ប្រជាជនយើងនិងប្រែក្លាយបណ្តាទីក្រុងដែលធ្លាប់តែមានសន្តិភាពទៅជាគោលដៅយោធា។វាអាក្រក់ណាស់ហើយនឹងគ្មានថ្ងៃអាចវបំភ្លេចទេ»។
លោក វ៉ូឡូឌីមៀរ ហ្សេឡេនស្គី បាននិយាយថា ឆ្មាំព្រំដែននៅកោះហ្សេតមីនី(Zmiinyi)ក្នុងតំបន់អូដេសា(Odesa)ត្រូវបានសម្លាប់ទាំងអស់កាលពីថ្ងៃព្រហស្បតិ៍ ហើយរុស្ស៊ីបានចូលកាន់កាប់កោះនេះហើយ។
កងកម្លាំងអ៊ុយក្រែនក៏កំពុងប្រយុទ្ធទល់នឹងទាហានផ្សេងទៀតនៅចម្ងាយប៉ុន្មានគីឡូម៉ែត្រពីទីក្រុងគៀវដើម្បីដណ្តើមកាន់កាប់អាកាសយានដ្ឋានយុទ្ធសាស្ត្រមួយ។ការផ្ទុះខ្លាំងៗត្រូវបានគេឮនៅក្នុងរដ្ឋធានីគៀវនិងទីក្រុងដទៃទៀត ហើយមនុស្សសំរុកទៅកាន់ស្ថានីយរថភ្លើងនិងធ្វើដំណើរតាមរថយន្តតាមដងផ្លូវចេញពីទីក្រុង នៅពេលរដ្ឋាភិបាលប្រកាសថា អតីតសាធារណរដ្ឋសូវៀតមួយនេះ កំពុងមើលឃើញការឈ្លានពានមួយមកពីខាងកើត ខាងជើងនិងខាងត្បូង៕
សូមបញ្ជាក់ថាកាលពីថ្ងៃព្រហស្បតិ៍ រុស្ស៊ីបានបើកការវាយប្រហារទ្រង់ទ្រាយធំមួយលើអ៊ុយក្រែនខាងកើត ដោយផ្តោតលើទីក្រុងនិងមូលដ្ឋានទ័ពជាច្រើនជាមួយនឹងការវាយប្រហារតាមផ្លូវអាកាសឬការបាញ់ផ្លោង ដែលនាំអោយជនស៊ីវិលសំរុកទៅកាន់ស្ថានីយរថភ្លើងនិងជិះរថយន្តភៀសខ្លួនចេញពីទីក្រុង។
