មកមើលភូមិគ្រឹះថ្មីរបស់តួ Thor អាចធំជាងទីស្នាក់ការកណ្តាល Avengers ទៀត (មានវីដេអូ)

ក្នុងឆ្នាំ២០១៧ លោក Chris Hemsworth ដែលមនុស្សម្នាហៅលោកថា «Thor»នោះ បានចាប់ផ្តើមកែលម្អភូមិគ្រឹះក្នុងក្តីស្រមៃរបស់លោកសាជាថ្មី នៅម្តុំតំបន់ឆ្នេរ Bryon Bay ប្រទេសអូស្រ្តាលី។ ដោយចំណាយទឹកប្រាក់អស់ ៩លានដុល្លារ និងរយៈពេល២ឆ្នាំ នៅទីបំផុតភូមិគ្រឹះដ៏ធំស្កឹមស្កៃនេះជិតសាងសង់រួចជាស្ថាបពរហើយ។

យោងតាមប្រភពច្បាស់ការណ៍មួយបានឱ្យដឹងថា លោក Hemsworth បានវាយកម្ទេចភូមិគ្រឹះចាស់ចោលទាំងស្រុង (សង្ស័យយកញញួរ Thor ដំចោលក៏មិនដឹង) ហើយបានសាងសង់ថ្មីយកតែម្តង បន្ទាប់ពីទទួលបានសិទ្ធិអនុញ្ញាតសាងសង់ផ្ទះថ្មីកាលពីខែមីនា ឆ្នាំ២០១៧កន្លងទៅនេះ។

ភូមិគ្រឹះដ៏ធំស្កឹមស្កៃនេះមានទំហំផ្ទៃដីដល់ទៅ ៤.២ហិកតា ហ៊ុមព័ទ្ធទៅដោយព្រៃឈើ និងឆ្នេរសមុទ្រនៅជុំវិញ វាពិតជាមានទេសភាពស្រស់ស្អាតខ្លាំងមែនទែន។

ប្រភពដដែលបានឱ្យដឹងដា នៅពេលសាងសង់រួច ភូមិគ្រឹះនេះនឹងមាន បន្ទប់គេងចំនួន៦ អាងហែលទឹកនៅលើដំបូលប្រវែង ៥០ម៉ែត្រមួយ កន្លែងហាត់ប្រាណដ៏ធំមួយ បន្ទប់ស្ទីមមួយ បន្ទប់ហ្គេមមួយ បន្ទប់មើលរឿងមួយ និងបន្ទប់សម្រាប់ធ្វើការដ៏ធំមួយទៀត។

ភូមិគ្រឹះរបស់លោក Hemsworth ពិតជាធំខ្លាំងណាស់ ដល់ថ្នាក់អ្នកប្រើប្រាស់អ៊ីនធើណេតជាច្រើន គិតថាវាអាចធំជាង ឬធំប្រហែលទៅនឹងទីស្នាក់ការកណ្តាល Avengers ទៅទៀត។

ប្រភពដដែលបានឱ្យដឹងថា ប្តីប្រពន្ធលោក Hemsworth ព្រមទាំងកូនប្រុស-ស្រី ៣នាក់ទៀត នឹងរើមករស់នៅក្នុងភូមិគ្រឹះដ៏ធំស្កឹមស្កៃនេះ នៅពេលដែលវាសាងសង់រួចជាស្ថាបពរ។

យ៉ាងណាមិញ អ្នកជិតខាងមួយចំនួនក៏បានធ្វើការរិះគន់ចំៗចំពោះការរុះរើផ្ទះកម្សាន្តតម្លៃ ៧លានដុល្លារនេះចោល និងសាងសង់ភូមិគ្រឹះថ្មីវិញដែលអស់ ៩លានដុល្លារបន្ថែមទៀត ព្រោះពួកគេយល់ថាវាដូចជាលើសខ្លាំងពេក មិនសាកសមទៅនឹងបរិយាកាសជុំវិញនោះទេ ហើយថែមទាំងមានសម្លេងរំខាននានា ខណៈពេលសាងសង់ទៀត៕