សម្ដេចតេជោ ហួសចិត្តនឹងរឿងសំណើរសុំលុយទិញឡាន Ford ស៊េរី២០២២
សម្តេចតេជោ ហ៊ុន សែន នាយករដ្ឋមន្ត្រីកម្ពុជានារសៀលថ្ងៃទី២៣ កុម្ភៈ បង្ហាញការហួសចិត្តមួយជុំវិញសំណើររបស់ស្ថាប័នមួយ ដែលសុំទិញរថយន្តសេរីទំនើបម៉ាក Ford សេរី ២០២២ គ្រាន់តែដើម្បីចុះមូលដ្ឋាន ដូច្នេះសម្តេចសម្រេចមិនផ្តល់តាមការស្នើសុំនោះ ។
សម្តេចបានលើកឡើងបែបនេះនៅក្នុងពិធីបិទសន្និបាតប្រចាំឆ្នាំរបស់ក្រសួងមហាផ្ទៃ នៅសណ្ឋាគាររ៉េស៊ីដង់សុខាភ្នំពេញ នាថ្ងៃទី២៣ ខែកុម្ភៈ ឆ្នាំ២០២២ ។ ព្រមជាមួយគ្នានេះ សម្តេចបានបញ្ជាទៅគ្រប់ថ្នាក់ដឹកនាំគ្រប់ក្រសួង និងស្ថាប័ន ត្រូវចេះគិតគួរក្នុងការចំណាយនាសម័យកាលកូវីដ ដូច្នេះចំណាយណាមិនចាំបាច់ កុំចំណាយ ។ គម្រោងមិនចាំបាច់ទាំងឡាយរបស់រដ្ឋ ដែលមិនទាន់ចាប់ផ្តើមសាងសង់ ត្រូវពន្យាពេលសិន ដោយរង់ចាំឆ្លងផុតដំណាក់កាលកូវីដ១៩សិន។
សម្តេចបញ្ជាក់ថា អង្គភាពមួយនោះបានដាក់សំណើរមកថា ត្រូវការចាំបាច់សម្រាប់ ២០២២-២០២៣ ដូច្នេះត្រូវការទិញរថយន្ត Ford ២ គ្រឿង សេរី ២០២២ ។ សម្តេចបន្តថា «ខ្ញុំចារទៅវិញ ថាថវិកាខ្វះខាត» ដោយសម្តេចពន្យល់បញ្ជាក់ថា «យកអា Ford ទៅណាជិះ គឺប្រធាននាយកដ្ឋានអ្នកជិះ ជិះទៅណា? ជិះទៅមូលដ្ឋាន?» ។ ដូច្នេះ ទាំងអស់គ្នា យកចិត្តទុកដាកសន្សំសំចៃថវិកា កន្លែងណាគប្បីចាយចាំចាយ មិនចាំបាច់កុំចាយ។
នៅក្នុងឱកាសអញ្ជើញបិទសន្និបាតបូកសរុបលទ្ធផលការងាររបស់ក្រសួងមហាផ្ទៃសម្ដេចតេជោ ហ៊ុន សែន ក៏បានណែនាំដល់មន្ដ្រីរាជការទាំងអស់ត្រូវកាត់បន្ថយការចំ ណាយផ្សេងៗដែលមិនចាំបាច់ព្រោះរាជរដ្ឋាភិបាលកំពុងខ្វះខាតថវិកាពេលកំពុងប្រយុទ្ធប្រឆាំងជាមួយជំងឺកូវីដ។
សម្ដេចតេជោ ហ៊ុន សែន បានណែនាំឲ្យលោកឧបនាយករដ្ឋមន្រ្តី អូនព័ន្ធ មុនីរ័ត្ន រដ្ឋមន្ដ្រីក្រសួងសេដ្ឋកិច្ចនិងហិរញ្ញវត្ថុ ត្រូវគ្រប់គ្រងការចំណាយទាំងអស់ឲ្យបានម៉ឺងម៉ាត់បំផុតនៅក្នុងដំណាក់កាលនេះគ្រាដែលរាជរដ្ឋាភិ បាលត្រូវការថវិកាបន្ដទៀតដើម្បីប្រយុទ្ធប្រឆាំងជំងឺកូវីដ។
សម្ដេចតេជោនាយករដ្ឋមន្រ្តីមានប្រសាសន៍ថា «ខ្ញុំសូមស្នើឲ្យយកចិត្តទុកដាក់ សន្សំសំចៃថវិកា កន្លែងណាដែលត្រូវចាយ គម្បីចាយ កន្លែងណាដែលមិនគម្បីចាយគឺផ្អាក ចាយសិនទៅឬកុំចាយឬពន្យារការចាយសិនដើម្បីធានាឲ្យមានតុល្យភាពរវាងក្បាលចេញនិងក្បាលចូលកុំឲ្យបាត់តុល្យភាពខ្លាំងពេកធ្វើឲ្យប្រាក់សន្សំរបស់យើងកាន់តែខោចទៅ »។
សម្ដេចតេជោនាយករដ្ឋមន្ដ្រីបានបន្ដថាផែនការកសាងទាំងឡាយបើពន្យារពេលបានគឺត្រូវតែពន្យារពេលជាបណ្ដោះអាសន្នសិនហើយថ្នាក់ក្រោមជាតិក៏ដូចគ្នាដែរមិនមែន ចេះតែលើកសំណើមករដ្ឋមន្ដ្រីនោះទេជាហេតុធ្វើឲ្យរដ្ឋមន្ដ្រីទើសទាល់ទើបបញ្ជូនទៅសុំការសម្រេចពីនាយករដ្ឋមន្ដ្រី។
សម្ដេចតេជោ ហ៊ុន សែន បានបញ្ជាក់ថា៖«ផែនការខ្លះបើពន្យារបានគឺពន្យារ។ ខ្ញុំសូមឲ្យរដ្ឋមន្ដ្រីក្រសួងសេដ្ឋកិច្ចនិងហិរញ្ញវត្ថុគ្រប់គ្រងត្រង់ចំណុចនេះឲ្យបានម៉ឺងម៉ាត់ ព្រោះខ្ញុំមិនអាចអស់ទុនបម្រុងរបស់ខ្លួនសម្រាប់ការប្រយុទ្ធននោះទេហើយចេះតែចាយ ។
ខ្ញុំសូមស្នើទាំងអស់គ្នានៅទីនេះសូមកុំលើកសំណើហើយអ្នកនៅខាងក្រោមជាតិ នោះទៀតកុំរពិសដៃលើកសំណើមករដ្ឋមន្ត្រីទើសទាល់ក៏ស៊ីញ៉េ មកដល់នាយករដ្ឋមន្ដ្រីត្រូវបោះទៅរដ្ឋមន្ដ្រីក្រសួងសេដ្ឋកិច្ច …»៕
