រកឃើញសត្វព្រៃកម្រជាច្រើនប្រភេទ នៅក្នុងតំបន់ជួរភ្នំក្រវាញ
ពោធិ៍សាត់៖ តាមរយៈម៉ាស៊ីនថតស្វ័យប្រវត្តិនៅក្នុងតំបន់ជួរភ្នំក្រវាញ បានរកឃើញសត្វព្រៃកម្រជាច្រើនប្រភេទ ដូចជា ខ្លាពពក ខ្លាឃុំ ឈ្លូស និងសត្វព្រៃផ្សេងទៀត។ នេះបង្ហាញថា កម្ពុជាបានអភិរក្សធនធានធម្មជាតិបានល្អប្រសើរ ទើបសត្វព្រៃត្រូវបានការពារ។ នេះបើយោងតាមទិន្នន័យរបស់មន្ត្រីជំនាញ ក្រសួងបរិស្ថាន។
មន្ត្រីជំនាញក្រសួងបរិស្ថានបានដាក់ម៉ាស៊ីនថតស្វ័យប្រវត្តិជាង ៥០ គ្រឿងនៅក្នុងតំបន់ការពារធម្មជាតិក្នុងភូមិសាស្ត្រខេត្តកំពង់ស្ពឺ កោះកុង និងពោធិ៍សាត់ ចាប់ពីថ្ងៃទី ១០ ដល់ថ្ងៃទី ១៧ ខែកុម្ភៈ ឆ្នាំ ២០២២ ក្រុមជំនាញបានប្រទះឃើញ ដានជើង លាមក រូបភាព និងគន្លងសត្វព្រៃជាច្រើនប្រភេទ។ សត្វព្រៃដែលត្រូវបានរកឃើញនោះរួមមាន ដំរីអាស៊ី ខ្ទីង ប្រើសស្បូវ កែះ ឈ្លូស ជ្រូកព្រៃ ខ្លាពពក ខ្លាឃុំ ជ្រូកព្រុល ពង្រូល ឆ្កែព្រៃ និងប្រភេទសត្វព្រៃសំខាន់ៗមួយចំនួនទៀត។
កម្ពុជាត្រូវបានពិភពលោកទទួលស្គាល់ថា ជាប្រទេសដែលសម្បូរដោយជីវចម្រុះ ក្នុងនោះសរុបប្រមាណ ៣ ៩៩៣ ប្រភេទដែលរួមមានមានរុក្ខជាតិប្រមាណ ២ ៣០០ ប្រភេទ និងប្រភេទសត្វដូចជា ថនិកសត្វ ១២៣ ប្រភេទ សត្វស្លាបប្រមាណ ៥៤៥ ប្រភេទ ឧរង្គសត្វ ៨៨ ប្រភេទ ត្រី ៨៧៤ ប្រភេទ និងថលជលិក ៦៣ ប្រភេទ។
មន្ត្រីជំនាញបានដាក់ម៉ាស៊ីនថតស្វ័យប្រវត្តិ នៅតំបន់ការពារធម្មជាតិសរុបចំនួន ៥៣ គ្រឿង ក្នុងនោះភូមិសាស្ត្រខេត្តពោធិ៍សាត់ចំនួន ២០ គ្រឿង ខេត្តកោះកុង ២៣ គ្រឿង និងខេត្តកំពង់ស្ពឺចំនួន ១០ គ្រឿង។ ម៉ាស៊ីនថតស្វ័យប្រវត្តិទាំង ៥៣ គ្រឿង នេះគ្រោងនឹងប្រមូលត្រឡប់មកវិញ នៅក្នុងអំឡុងខែឧសភា ឆ្នាំ២ ០២២ ខាងមុខ។
សូមបញ្ជាក់ថា ចាប់ពីខែតុលា ឆ្នាំ ២០២១ រហូតដល់ខែមករា ឆ្នាំ ២០២២ នេះ ក្រសួងបរិស្ថានបានរកឃើញវត្តមានប្រភេទសត្វព្រៃមានដោយកម្រ ប្រភេទជិតផុតពូជ ប្រភេទទទួលរងគ្រោះថ្នាក់ ប្រភេទទទួលរងការគំរាមកំហែងចំនួន ១០ ប្រភេទ រួមមាន ដំរីអាស៊ី ខ្ទីង ប្រើសស្បូវ កែះ ខ្លាឃ្មុំតូច ខ្លាឃ្មុំធំ ឆ្កែព្រៃ ជ្រូកពោន ឬជ្រូកព្រុល សំពោចកលឿង និងស្វាត្រោស រួមជាមួយប្រភេទថនិកសត្វ និងបក្សីមួយចំនួនទៀតក្នុងតំបន់ការពារធម្មជាតិ៕
