ដើម្បីខ្មែរឈ្នះ ឈរបញ្ជាកូនក្រុមកណ្តាលភ្លៀង មិនខ្លាចនឿយហត់ គ្រូបង្វឹក ហុងដា ធ្វើឱ្យមហាជនរំភើបក្នុងចិត្តណាស់
ការប្រកួតពានរង្វាន់ AFF U23 CHAMPIONSHIP 2022 រវាងក្រុមជម្រើសជាតិកម្ពុជា និង ក្រុមជម្រើសជាតិ ប៊្រុយណេ អាយុក្រោម ២៣ ឆ្នាំ បានបញ្ចប់យ៉ាងរលូនកាលពីរាត្រីថ្ងៃទី ១៤ ខែកុម្ភៈ ឆ្នាំ ២០២២ កន្លងទៅនេះ នៅពហុកីឡដ្ឋានជាតិ មរតកតេជោ ដោយក្នុងនោះកម្ពុជាទទួលបានលទ្ធផលយ៉ាងគាប់ប្រសើរបំផុត គឺបានយកឈ្នះទៅលើដៃគូប្រកួត ៦-០ ឯណោះ។
ក្នុងនោះ ក្រោយបញ្ចប់តង់ទី ១ កម្ពុជារកបាន ៣ គ្រាប់ទល់នឹង ០ ទៅលើក្រុមជម្រើសជាតិ ប៊្រុយណេ និង នៅតង់ទី ២ ក្រុមគោព្រៃជំទងរបស់កម្ពុជា បានបង្កើតចង្វាក់លេងយ៉ាងសង់តង់គ្នាបន្ថែមទៀត គឺពួកគេអាចរកគ្រាប់បាល់បន្ថែមទៀតទៅលើក្រុម U23 ប៊្រុយណេ ដល់ទៅ ៣ គ្រាប់ ដែលនាំឱ្យលទ្ធផលផ្លូវការក្រោយបញ្ចប់ការប្រកួត U23 កម្ពុជា បានយកឈ្នះ ៦-០ លើ U23 ប៊្រុយណេ។
គួរឱ្យដឹងដែរថា នៅតង់ទី ១ រយៈពេល ៤៥ នាទី ក្រុមគោព្រៃកម្ពុជា រកបាន ៣ គ្រាប់ ដោយគ្រាប់បាល់ទី ១ រកបានដោយកីឡាករ សៀង ចន្ធា នៅនាទី ទី ១៨។ សម្រាប់គ្រាប់បាល់ទី ២ រកបាននៅនាទី ទី ២០ ដោយកីឡាករ ញាណ សុស៊ីដាន ឯគ្រាប់បាល់ទី ៣ គឺរកបាននៅនាទី ទី ៣២ ដោយកីឡាករ សារ ទី។ ចំពោះតង់ទី ២ ក្រុមគោព្រៃកម្ពុជា ក៏រកបាន ៣ គ្រាប់បន្ថែមទៀត ដោយគ្រាប់ទី ៤ គឺរកបាននៅនាទី ទី ៧២ ដោយកីឡាករ តាំង ប៊ុនឆៃ ហើយគ្រាប់ទី ៥ គឺរកបានដោយកីឡាករ ស រតនា នៅនាទី ទី ៨៦ និង ចុងក្រោយ គ្រាប់ទី ៦ គឺរកបានដោយកីឡាករ ណារ៉ុង កក្កដា នៅនាទី ទី ៨៩ បើទោះជាការចាប់ផ្តើមតង់ទី ២ មានភ្លៀងជោកជាំមែន។
ដោយឡែក អ្វីដែលចាប់អារម្មណ៍បន្ទាប់ពីជ័យជម្នះនោះហើយ គឺសកម្មភាពក្រៅតារាប្រកួត ដោយគេបានឃើញគ្រូបង្វឹកកម្ពុជា ជនជាតិជប៉ុន គឺកីឡាករ ហុង ដា ដែលបានឈរយ៉ាងបង្ហាញពីយុទ្ធិសាស្ត្រលេងដល់ក្រុមកីឡាករ និង ជាពិសេសនោះ គឺការលើកកម្លាំងចិត្តដល់កីឡាករកម្ពុជាទាំងអស់ ក្រោមអំណាចភ្លៀងកំពុងធ្លាក់យ៉ាងសន្ធឹក។
ក្រោយឃើញសកម្មភាពរបស់គ្រូបង្វឹកកម្ពុជាដូច្នេះ អ្នកគាំទ្រកម្ពុជាជាច្រើនបានសម្តែងក្តីរំភើបរំជួលចិត្តយ៉ាងខ្លាំង ជាមួយនឹងការចែករំលែកតៗគ្នានូវវីដេអូដែលកំពុងមានវត្តមាននៅលើបណ្តាញសង្គមហ្វេសប៊ុករបស់គ្រូបង្វឹករូបនេះ ដោយក្នុងនាមជាគ្រូម្នាក់ លោក ហុងដា ស៊ូឈរហាលភ្លៀងកំដរ និង លើកទឹកចិត្តក្រុមកីឡាករកម្ពុជារហូតចប់ការប្រកួត៕
