ក្នុងមួយឆ្នាំៗ ពលករខ្មែរធ្វើការក្រៅប្រទេស ផ្ញើរប្រាក់ជូនក្រុមគ្រួសារប្រហែល $២,៨ពាន់លាន
ភ្នំពេញ៖ រដ្ឋមន្ត្រីក្រសួងការងារ អះអាងថា ក្នុងមួយឆ្នាំៗ តាមការប៉ាន់ប្រមាណពីការប្រាក់បញ្ញើដែលបងប្អូនពលករដែលរស់នៅនិងធ្វើការក្រៅប្រទេស ដែលបានផ្ញើរប្រាក់ជូនក្រុមគ្រួសារចំនួនប្រហែល ២,៨ពាន់លានដុល្លារអាម៉េរិក ដែលតាមរយៈទឹកប្រាក់ទាំងនេះបានចូលរួមចំណែកជំរុញដល់កំណើន សេដ្ឋកិច្ចជាតិ ហើយជីវភាពរស់នៅរបស់ក្រុមគ្រួសារពលករកាន់តែប្រសើរឡើងផងដែរ។
នៅក្នុងកិច្ចប្រជុំបូកសរុបលទ្ធផលការងារសម្រេចបានប្រចាំឆ្នាំ២០២១ និងទិសដៅអនុវត្តបន្តឆ្នាំ២០២២ របស់បេឡាជាតិសន្តិសុខសង្គម (ប.ស.ស) លោក អ៊ិត សំហេង រដ្ឋមន្ត្រីក្រសួងការងារ បានអោយដឹងថា គិតត្រឹមឆ្នាំ២០២១ រាជរដ្ឋាភិបាលបានផ្តល់ឱកាសការងារនៅក្រៅប្រទេសជូនប្រជាពលរដ្ឋបានចំនួនជាង ១.៣០១.៦០៩នាក់ ក្នុងនោះប្រទេសថៃមានចំនួន ១.២២០.១៩៧នាក់ ប្រទេសកូរ៉េមានចំនួនជាង ៤៥.០០០នាក់ ប្រទេសម៉ាឡេស៊ីមានចំនួន ២៣.០២៧នាក់ ប្រទេសជប៉ុនមានចំនួន ១១.៤៥៣នាក់ ប្រទេសសិង្ហបុរីមានចំនួន ៨២១នាក់ ប្រទេសហុងកុងមានចំនួន ២០២នាក់ និងអារ៉ាប់ប៊ីសា-អូឌីតចំនួន ៤៣នាក់។
ជាមួយគ្នានេះ លោករដ្ឋមន្ត្រី បានលើកឡើងបន្តថា កម្ពុជាបន្តពង្រឹងកិច្ចសហការជាមួយប្រទេសជាដៃគូ រួមមាន ថៃ ម៉ាឡេស៊ី កូរ៉េ ជប៉ុន ហុងកុង សិង្ហបុរី និងប្រទេសមួយចំនួនទៀត ដើម្បីផ្តល់ឱកាសការងារជូនពលករ ការពារសិទ្ធិ និងផលប្រយោជន៍ពលករដែលកំពុងបម្រើការងារនៅប្រទេសទាំងនោះ បង្កលក្ខណៈសម្បត្តិឱ្យពលករទទួលបានរបបគាំពារសង្គមទាំងបច្ចុប្បន្ន និងពេលដែលវិលត្រឡប់មកវិញ៕
