សុភ័ក្ត្រ កុសុម៉ា តែងខ្លួនបែបចិនដើម្បីយកហ៊ុងស៊ុយឆ្នាំថ្មី
ថ្មីៗនេះ កៀកថ្ងៃចូលឆ្នាំចិន អ្នកលេងបណ្ដាញសង្គម ជាពិសេសអ្នកគាំទ្ររបស់ពិធីការិនីល្បីឈ្មោះ សុភ័ក្រ្ត កុសុម៉ា កំពុងតែផ្ទុះការភ្ញាក់ផ្អើលស្រឡាំងកាំងគ្រប់គ្នា ក្រោយពីបានឃើញនាងបញ្ចេញរូបភាពប៉ុន្មានសន្លឹក ថតក្នុងឈុតប្រពៃណីចិនដើម្បីត្រៀមស្វាគមន៍ ក៏ដូចជាអបអរថ្ងៃចូលឆ្នាំចិននាងមុខនេះ។
អ្វីដែលធ្វើឱ្យមហាជនឃើញរូបភាពទាំងនេះហើយសឹងនិយាយមិនចេញនោះ គឺពិធីការិនីរូបនេះ បានគ្រងឈុតប្រពៃណីចិនពណ៌ខៀវស្រងាត់ ទៅតាមរាសីហុងស៊ុយឆ្នាំនេះ តម្រូវឱ្យតុបតែងកន្លែងសែន ក៏ដូចជាស្លៀកពាក់ពណ៌ខៀវដើម្បីយកលាភជ័យនោះ។
រូបភាពនេះ ធ្វើឱ្យមហាជនពិតជាហាក់ប្លែកភ្នែក ប្លែកអារម្មណ៍ខ្លាំង ព្រោះថាកន្លងទៅធ្លាប់តែឃើញគេគ្រងឈុតពណ៌ក្រហម ឬ ពណ៌លឿង ប៉ុន្តែនេះជាលើកដំបូងហើយ ដែលទើបតែឃើញពិធិការិនីរូបនេះមួយតុបតែងខ្លួនក្នុងឈុតពណ៌បែបនេះ។
ជាមួយគ្នានោះ រូបភាពនេះដែរ កំពុងតែត្រូវបានអ្នកគាំទ្រ នាំគ្នាធ្វើចែករំលែកបន្តគ្នាពាសពេញបណ្ដាញសង្គម បង្ហាញពីអារម្មណ៍ភ្ញាក់ផ្អើលខ្លាំង អស់សំណើចផង ហួសចិត្តផង និង ពោលសរសើរនាងពូកែរកនឹកអ្វីថ្មីៗប្លែកៗមុខគេចែកជូនដល់មហាជន៕
