ក្ដុកក្ដួលបំផុត! ពលរដ្ឋអាហ្វហ្គានីស្ថាន ក្រពេករហូតត្រូវលក់ក្រលៀន ឬលក់កូន ដើម្បីបានលុយចិញ្ចឹមក្រពះ
ចាប់តាំងតែពីក្រុមតាលីបង់ កាន់កាប់បានប្រទេសអាហ្វហ្គានីស្ថានកាលពីខែសីហា ឆ្នាំ ២០២១ រហូតមកទល់ពេលនេះ បានធ្វើឱ្យជំនួយអន្តរជាតិរាប់ពាន់លានដុល្លារត្រូវបានដកចេញពីប្រទេស បណ្ដាលឱ្យប្រទេសមួយនេះធ្លាក់ផុងក្នុងភាពក្រីក្រដោយសង្គ្រាម គ្រោះរាំងស្ងួត និងទឹកជំនន់។
ការធ្លាក់ផុងខ្លួនដោយភាពខ្វះខាតក្រខ្សត់នេះដែរ បានធ្វើឱ្យពលរដ្ឋអាហ្វហ្គានីស្ថានរាប់ពាន់នាក់ជួបប្រទះការលំបាកជាខ្លាំង រហូតពួកគេត្រូវបានប្រទះឃើញដូចៗគ្នាជាមួយស្នាមកាំបិតត្រង់ក្រលៀន ដែលលទ្ធផលមកពីការវះកាត់ក្រលៀនលក់។ តាមសារព័ត៌មានក្នុងស្រុកបានឱ្យដឹងថា ក្រលៀនមួយគឺលក់បានក្នុងតម្លៃចន្លោះពី ១ ៥០០ ទៅ ២ ០០០ ដុល្លារ ហើយតម្លៃគឺបានបន្តធ្លាក់ចុះទៅៗ ដោយសារតែមានមនុស្សលក់វាច្រើនពេក។
ក្នុងនោះដែរ បើតាមសម្ដីពលរដ្ឋអាហ្វហ្គានីស្ថានម្នាក់ឈ្មោះ Ghulam Hazrat បាននិយាយថា ៖«ខ្ញុំមិនអាចលើកដៃសុំលុយគេបានឡើយ។ ដល់អ៊ីចឹង ខ្ញុំក៏សម្រេចចិត្តទៅមន្ទីរពេទ្យ ដើម្បីលក់ក្រលៀនរបស់ខ្ញុំ ដើម្បីបានប្រាក់សន្សំទុកគ្រាន់ចិញ្ចឹមកូនៗខ្ញុំ»។
ដោយឡែកក្រៅពីការលក់ក្រលៀន ពលរដ្ឋខ្លះវិញ ក៏ជ្រើសរើសការលក់កូនៗរបស់ពួកគេ ដើម្បីអាចបានប្រាក់យកមកចិញ្ចឹមក្រពះក្នុងគ្រួសារផងដែរ៕
