ប៉ូលីសដែលជិះម៉ូតូធំបុ.កអ្នកគ្រូពេទ្យម្នាក់ស្លា.ប់ និងឪពុក បានបួសជាព្រះសង្ឃ ខណៈមន្រ្តីបានបញ្ជាក់ហេតុផលថា…
Amarin TV បានឲ្យដឹងនៅថ្ងៃទី២៥ ខែមករា ឆ្នាំ២០២២ ថា ចំពេលផ្ទុះការរិះគន់ខ្លាំងៗ នៅពេលនេះ ប៉ូលីសវ័យក្មេងដែលជិះម៉ូតូធំបុកអ្នកគ្រូពេទ្យរូបស្រស់ស្អាតម្នាក់ ខណៈនាងកំពុងឆ្លងផ្លូវសម្រាប់អ្នកដំណើរថ្មើរជើង រហូតបាត់បង់ជីវិតគួរឲ្យអាសូរ ត្រូវបានអនុញ្ញាតឲ្យបួសជាព្រះសង្ឃហើយ។ នេះបើតាមឧបនាយករដ្ឋមន្ត្រី Wisanu Krua-Ngam បានបំភ្លឺថា អនុញ្ញាតឲ្យធ្វើដូច្នេះ ដោយសារតែបព្វជិត ក៏អាចផ្តល់សក្ខីកម្មនៅតុលាការបានដែរ។
ជនជាប់ចោទឈ្មោះ Norawit Buadok និងឪពុករបស់គាត់ឈ្មោះ Nikhom Buadok ប្រធានក្រុមចរាចរណ៍នៅស្ថានីយ៍ប៉ូលីស Pathumwan ទាំងពីរនាក់បានបួសនៅវត្ត Pariwat Ratchasongkhram កាលពីម្សិលមិញហើយ ដើម្បីឧទ្ទិសកុសលដល់ជនរងគ្រោះអ្នកគ្រូវេជ្ជបណ្ឌិត Waralak Supawatchariyakul ដែលមានឈ្មោះហៅក្រៅថា Rabbit ជាគ្រូពេទ្យឯកទេសខាងភ្នែកនៅមហាវិទ្យាល័យវេជ្ជសាស្ត្រនៃសាកលវិទ្យាល័យ Chulalongkorn ។
លោក Wisanu បានចង្អុលបង្ហាញថា ការបួសប៉ុន្មានថ្ងៃមិនជាបញ្ហាទេ ហើយបើទោះជាជនសង្ស័យបួសមិនកំណត់ក៏នៅតែត្រូវចាកចេញពីព្រះសង្ឃដើម្បីទទួលទោសដែរ។
លោកក៏បានគូសបញ្ជាក់ថា បើជនសង្ស័យបួសជាព្រះសង្ឃ វារឹតតែពិបាកក្នុងការគេចខ្លួន ព្រោះដឹងច្បាស់ថានៅទីណា។
គួរបញ្ជាក់ថា អ្នកគ្រូពេទ្យ Ribbit ត្រូវបានប៉ូលីសវ័យក្មេងខាងលើ ជិះម៉ូតូធំបើកបរបំពានច្បាប់ចរាចរណ៍ច្រើនករណី បានបុកពេញទំហឹង ខណៈនាងកំពុងឆ្លងផ្លូវ បណ្តាលឲ្យបាត់បង់ជីវិតគួរឲ្យសោកស្តាយបំផុត ស្ថិតនៅចំណុចផ្លូវថ្មើរជើង ផាយ៉ាថៃ កាលពីថ្ងៃទី២១ ខែមករា ឆ្នាំ២០២២ កន្លងទៅថ្មីៗនេះ៕
