ព្រះអង្គម្ចាស់ នរោត្តម ចក្រាវុធ ប្តេជ្ញាការពារ និងថែរក្សាគណបក្សហ៊្វុនស៊ិនប៉ិច ឱ្យបានគង់វង្ស
កំពត៖ យាងចុះជួបសំណេះសំណាលជាមួយថ្នាក់ដឹកនាំ ថ្នាក់ខេត្ត ស្រុក ឃុំ នៅទីស្នាក់ការគណបក្សខេត្តកំពតនៅថ្ងៃទី២៤ ខែមករា ឆ្នាំ២០២២នេះ ព្រះប្រធានស្តីទីគណបក្សហ៊្វុនស៊ិនប៉ិច ប្តេជ្ញាការពារ និងថែរក្សាគណបក្សហ៊្វុនស៊ិនប៉ិច ឱ្យបានគង់វង្ស។
ព្រះអង្គម្ចាស់ នរោត្តម ចក្រាវុធ ក្នុងនាមជាអ្នកបន្តវេន និងជាមេដឹកនាំនៃគណបក្សហ៊្វុនស៊ិនប៉ិច បានប្តេជ្ញាថា នឹងការពារថែរក្សាគណបក្សឱ្យគង់វង្ស ហើយព្រះអង្គមានជំនឿថា គណបក្សហ៊្វុនស៊ិនប៉ិច នឹងទទួលបានកាគាំទ្រសារជាថ្មី ក្នុងការបោះឆ្នោតនាពេលខាងមុខ។ ព្រះអង្គបានប្រកាសស្វាគមន៍ និងបើកទ្វាចំហរ ចំពោះអ្នករាជានិយម អ្នកជាតិនិយម មករួបរួម សាមគ្គីគ្នាជាមួយមហាគ្រួសារ ក្រោមដំបូលគណបក្សហ៊្វុនស៊ិនប៉ិច។
ការប្តេជ្ញារបស់ព្រះអង្គ ធ្វើឡើង បន្ទាប់ពីមានជម្លោះផ្ទៃក្នុងកាន់តែខ្លាំងឡើងៗ ហើយថ្នាក់ដឹកនាំគណបក្សហ៊្វុនស៊ិនប៉ិចមួយក្រុមដែលមានលោក សាយ ហាក់ លោក ហេង ចន្ថា និងលោក ផាន់ សិទ្ធី ជាដើម គ្រោងនឹងរៀបចំធ្វើសមាជ នាពេលខាងនេះ ដើម្បីយាងសម្តេចរាជបុត្រី ព្រះអនុជ នរោត្តម អរុណរស្មី អនុប្រធានទី១គណបក្ស ធ្វើជាព្រះប្រធានគណបក្សហ្វ៊ុនស៊ិនប៉ិច។
កាលពីថ្ងៃទី២០ ខែមករា ឆ្នាំ២០២២ សម្តេចក្រឡាហោម ស ខេង រដ្ឋមន្រ្តីក្រសួងមហាផ្ទៃ បានធ្វើលិខិតទូលថ្វាយព្រះអង្គម្ចាស់ នរោត្តម ចក្រាវុធ ដោយស្នើឱ្យព្រះអង្គម្ចាស់ ត្រូវធ្វើការសម្របសម្រួលផ្ទៃក្នុងគណបក្ស ដើម្បីរៀបចំសមាជជ្រើសរើស ក្បាលម៉ាស៊ីនដឹកនាំគណបក្ស ឱ្យស្របតាមខ្លឹមសារប្រការ១៦ ប្រការ១៧ ថ្មី ប្រការ១៩ ប្រការ២០ ប្រការ២៤ និងប្រការ៣៥ នៃលក្ខន្តិកៈគណបក្ស តម្កល់ទុកនៅក្រសួងមហាផ្ទៃ ព្រមទាំងបញ្ញត្តិមាត្រា១៨ ថ្មី នៃច្បាប់ស្តីពីគណបក្សនយោបាយផងដែរ៕
