ថ្ងៃស្អែកសាលាដំបូងរាជធានីភ្នំពេញនឹងបើកសវនាការជំនុំជម្រះក្តី សំណុំរឿងលោក កឹម សុខា
ភ្នំពេញៈ តាមការគ្រោងទុកនៅថ្ងៃទី ១៩ ខែមករា សាលាដំបូងរាជធានីភ្នំពេញនឹងបើកសវនាការជំនុំជម្រះក្តី សំណុំរឿងលោក កឹម សុខា ក្រោមបទចោទ «សន្ទិដ្ឋភាពជាមួយបរទេស (ក្បត់ជាតិ)» ដើម្បីផ្តួលរំលំរដ្ឋាភិបាល បន្ទាប់ពីត្រូវបានពន្យារពេលមួយរយៈ។
លោក ប្លង់ សុផល អ្នកនាំពាក្យអយ្យការអមសាលាដំបូងរាជធានីភ្នំពេញ បានអោយដឹងថា សម្រាប់សវនាការដែលគ្រោងធ្វើនៅថ្ងៃទី ១៩ មករា ក្រុមប្រឹក្សា ដែលត្រូវជំនុំជម្រះគឺដដែលដូចលើកមុន មិនមានការផ្លាស់ប្តូរទេ ក្នុងនោះរួមមាន លោក កូយ សៅ ប្រធានក្រុមប្រឹក្សាជំនុំជម្រះ លោក សេង លាង និងលោក ធាម ច័ន្ទពិសិដ្ឋ ចៅក្រមប្រឹក្សា។ តំណាងអយ្យការអមសវនាការ លោក ប្លង់ សុផល ព្រះរាជអាជ្ញារងនៃអយ្យការអមសាលាដំបូងរាជធានីភ្នំពេញ និងក្រឡាបញ្ជីលោក ជ័យ វាសនា។
តាមដីកាកោះហៅចុះថ្ងៃទី ១៣ ខែធ្នូ ឆ្នាំ ២០២១ លោក ប្លង់ សុផល បានតម្រូវឱ្យលោក កឹម សុខា ត្រូវចូលរួមសវនាការក្នុងសំណុំរឿង «សន្ទិដ្ឋភាពជាមួយបរទេស» នៅព្រឹកថ្ងៃទី ១៩ ខែមករា ឆ្នាំ ២០២២ ជាកំហិត។
លោក កឹម សុខា ត្រូវបានចាប់ខ្លួនកាលពីថ្ងៃទី ៣ កញ្ញា ឆ្នាំ ២០១៧ នៅគេហដ្ឋានរបស់លោក ក្នុងខណ្ឌទួលគោក និងត្រូវបានបញ្ជូនទៅឃុំខ្លួននៅក្នុងពន្ធនាគារ ត្រពាំងផ្លុង ខេត្តត្បូងឃ្មុំ ដោយចោទពីបទ «សន្ទិដ្ឋភាពជាមួយបរទេស» ដើម្បីផ្តួលរំលំរដ្ឋាភិបាលដោយគិតមកដល់ពេលនេះ គឺមានរយៈពេល ៤ ឆ្នាំហើយ។
លោក កឹម សុខា ត្រូវបានដោះលែងឱ្យនៅក្រៅឃុំ កាលពីថ្ងៃទី ១០ ខែវិច្ឆិកា ឆ្នាំ ២០១៩ ប៉ុន្តែត្រូវដាក់ឱ្យស្ថិតក្រោមការត្រួតពិនិត្យតាមផ្លូវតុលាការ ទី ១ មិនត្រូវចេញក្រៅព្រំប្រទល់ដែនដីនៃព្រះរាជាណាចក្រកម្ពុជា ទី ២ មិនត្រូវធ្វើសកម្មភាពនយោបាយ និងទី ៣ ត្រូវឆ្លើយតបនឹងការកោះហៅពីគ្រប់សមត្ថកិច្ច៕
