តៃវ៉ាន់ ៖ អ្នកណាដែលនាំសាច់ជ្រូកពីថៃ នឹងត្រូវផាកពិន័យយ៉ាងធ្ងន់ធ្ងរ

តៃវ៉ាន់៖ បន្ទាប់ពីជំងឺប៉េស្តជ្រូកអាហ្វ្រិក (ASF) ត្រូវបានបញ្ជាក់នៅក្នុងប្រទេសថៃ តៃវ៉ាន់ ព្រមាន អ្នកណាដែលនាំសាច់ជ្រូក ឬផលិតផលសាច់ជ្រូកពីប្រទេសថៃ នឹងត្រូវផាកពិន័យយ៉ាងធ្ងន់ធ្ងរ។ នេះបើតាមការចេញផ្សាយរបស់កាសែតបាងកកប៉ុស្តិ៍។

មជ្ឈមណ្ឌលប្រតិបត្តិការសង្គ្រោះបន្ទាន់កណ្តាលរបស់តៃវ៉ាន់ (CEOC) បាននិយាយថា អ្នកណាម្នាក់ដែលព្យាយាមនាំយកសាច់ជ្រូក ឬផលិតផលសាច់ជ្រូកពីប្រទេសថៃតាមអាកាសយានដ្ឋាន និងកំពង់ផែសមុទ្រ នឹងត្រូវពិន័យជាប្រាក់ ២០០.០០០ដុល្លារតៃវ៉ាន់ (២៤១.០០០បាត)។ CEOC បន្ថែមថា អ្នកបំពានអាចត្រូវបានបដិសេធមិនឱ្យចូលប្រទេស និងនិរទេស។

នាយកដ្ឋានអភិវឌ្ឍន៍បសុសត្វនៃប្រទេសថៃកាលពីថ្ងៃអង្គារបានរកឃើញករណី ASF នៅកន្លែងសត្តឃាតមួយក្នុងខេត្ត Nakhon Pathom។ អាជ្ញាធរថៃបានបដិសេធម្តងហើយម្តងទៀតនូវការផ្ទុះឡើងនៃជំងឺ ASF ហើយកាលពីមុនបានសន្មតថាការស្លាប់ជ្រូកក្នុងកសិដ្ឋានភាគច្រើនបណ្តាលមកពីជំងឺមេរោគមួយទៀតហៅថា porcine reproductive និង respiratory syndrome។

កាលពីខែធ្នូ CEOC បានរកឃើញសាច់ក្រកពីប្រទេសថៃមានផ្ទុកមេរោគ ASF ប៉ុន្តែនាយកដ្ឋានថៃបានអះអាងថា ការចម្លងរោគនេះអាចបណ្តាលមកពីសាច់ជ្រូកដែលត្រូវបានរត់ពន្ធចូលក្នុងប្រទេស ព្រោះគ្មានករណីជំងឺ ASF ត្រូវបានរកឃើញនៅក្នុងប្រទេសថៃនោះទេ។

ប្រទេសថៃបានហាមឃាត់ការនាំចេញជ្រូកកាលពីថ្ងៃព្រហស្បតិ៍សប្តាហ៍នេះ រហូតដល់ថ្ងៃទី ៥ ខែមេសា ក្នុងការប៉ុនប៉ងដើម្បីដោះស្រាយការកើនឡើងនៃតម្លៃសាច់ជ្រូកនៅក្នុងប្រទេស៕