ក្រោយចាញ់ Barcelona ធ្ងន់ធ្ងរ! Jurgen Klopp និយាយទៅកាន់កីឡាករទាំងអស់ថា…..

អេស្ប៉ាញ៖ លោក Jurgen Klopp បានឱ្យដឹងពីពាក្យសម្តីដែលលោកនិយាយទៅកាន់កីឡាករក្នុងក្រុម ក្រោយបរាជ័យ ៣-០ នៅកីឡដ្ឋាន Camp Nou។ អ្នកសារព័ត៌មានជាច្រើនបានសួរថា “តើលោកបាននិយាយអ្វីខ្លះទៅកាន់កូនក្រុមក្រោយបរាជ័យប្រកួតនេះ?”លោក Jurgen Klopp បាននិយាយប្រាប់វិញថា៖ “ខ្ញុំបាននិយាយទៅកាន់ពួកគេថា ខ្ញុំពិតជាមានមោទកភាពចំពោះពួកគេ ហើយខ្ញុំពេញចិត្តចំពោះការប្រកួតនេះ។” 

លោកបានបន្តថា៖ “ពួកគេមិនចាំបាច់គិតពីការប្រកួតជើងទី២ ទល់នឹង Barcelona ឡើយ។ ការប្រកួតបន្ទាប់របស់យើងគឺទល់នឹង Newcastle ដូច្នេះហើយអ្វីដែលយើងត្រូវផ្តោតអារម្មណ៍បំផុតនោះ គឺការប្រកួតជាមួយ Newcastle នៅចុងសប្តាហ៍នេះ”។ ក្រៅពីនេះ លោក Jurgen Klopp ក៏បាននិយាយពីកីឡាករ Lionel Messi ផងដែរថា៖ “ កីឡាបាល់ទាត់គឺបែបនេះឯង។ ពួកយើងបានដឹងរួចស្រេចហើយថា Messi គឺជាកំពូលកីឡាករលំដាប់ពិភពលោកម្នាក់ ដូចនេះពេលដែលខ្ញុំមើលឃើញទម្រង់លេងដ៏អស្ចារ្យរបស់គេម្តងទៀត ខ្ញុំក៏មិនសូវភ្ញាក់ផ្អើលប៉ុន្មានដែរ”។

គួរបញ្ជាក់ថា Liverpool នឹងត្រូវមានភារកិច្ចនៅ Premier League មួយប្រកួតនាចុងសប្តាហ៍នេះ ដោយត្រូវប៉ះក្រុម Newcastle United មុននឹងទទួលស្វាគមន៍ក្រុម Barcelona នៅជើងទី២ ក្នុងទឹកដីកីឡដ្ឋាន Anfield វិញម្តងនៅថ្ងៃពុធ សប្តាហ៍ក្រោយ៕