រោងចក្រដំឡើងរថយន្ត Ford នឹងអាចចាប់ផ្តើមដំណើរការនៅក្នុងខែមេសាខាងមុខ
ភ្នំពេញៈ អគ្គនាយកក្រុមហ៊ុន R.M.Asia បានឱ្យដឹងថា ដំណើរការសាងសង់រោងចក្រដំឡើងរថយន្តសម្រេចបាន ១០០ ភាគរយហើយ ខណៈការដំឡើងឧបករណ៍នានាក៏សម្រេចបានជិត ៧០ ភាគរយផងដែរ ដែលនឹងអនុញ្ញាតឱ្យក្រុមហ៊ុនចាប់ផ្តើមសកម្មភាពដំឡើងរថយន្តនៅក្នុងខែមេសាខាងមុខ គឺស្របតាមផែនការដែលបានកំណត់។
លោក ង៉ន សាំង អគ្គនាយកក្រុមហ៊ុន R.M.Asia ដែលជាក្រុមហ៊ុនចុះបញ្ជីនៅផ្សារមូលបត្រកម្ពុជា (CSX) បានអោយដឹងថា គិតមកទល់ពេលនេះដំណើរការសាងសង់អគាររោងចក្រសម្រេចបាន ១០០ ភាគរយហើយ ប៉ុន្តែដំណើរការបំពាក់ឧបករណ៍នានានៅសល់ប្រហែល ៣០-៤០ ភាគរយទៀតទើបរួចរាល់។ រោងចក្រនេះ មានទីតាំងស្ថិតនៅតំបន់សេដ្ឋកិច្ចពិសេសក្រគរ ខេត្តពោធិ៍សាត់។
លោកថា «តាមអ្វីដែលសម្រេចបានអំពីវឌ្ឍនភាពនៃការងារសាងសង់របស់យើង ខ្ញុំយល់ថាយើងសម្រេចបានទៅតាមផែនការដែលបានគ្រោងទុក ដោយនឹងអាចចាប់ផ្តើមដំណើរការដំឡើងនៅមុនចូលឆ្នាំខ្មែរខាងមុខ»។
យោងតាមលោក ង៉ន សាំង ការសម្រេចបាននៃការសាងសង់ដោយរលូននេះ គឺដោយសារមានការជួយជ្រោមជ្រែងពីថ្នាក់ដឹកនាំគ្រប់មជ្ឈដ្ឋានទាំងថ្នាក់ជាតិ និងមូលដ្ឋាន ជាពិសេសគឺក្រុមប្រឹក្សាអភិវឌ្ឍន៍កម្ពុជា និងការផ្តល់ពន្ធអនុគ្រោះពីរាជរដ្ឋាភិបាល។ លោកបន្តថា នៅដំណាក់កាលដំបូង រោងចក្របានជ្រើសរើស និងបណ្តុះបណ្តាលបុគ្គលិកចំនួន ២០០ នាក់រួចរាល់ហើយដែលនឹងចាប់ផ្តើមការងារនៅចុងខែមីនា និងដើមខែមេសា ហើយនៅដំណាក់កាលទី ២ រោងចក្រនឹងត្រូវការបុគ្គលិករហូតដល់ ៥០០ នាក់។ ប៉ុន្តែលោកក៏ជួបផលវិបាកមួយចំនួនដែរទាក់ទងនឹងប្រព័ន្ធឡូជីស្ទិក។
លោកបន្តថា«នៅដំណាក់កាលដំបូងនេះ យើងនឹងធ្វើការដំឡើងរថយន្តចំនួន ៤ ៥០០ ក្នុង ១ ឆ្នាំសម្រាប់តម្រូវការក្នុងទីផ្សារ។ ប៉ុន្តែសមត្ថភាពផលិតទាំងមូល គឺរោងចក្រនេះអាចដំឡើងបានរហូតទៅដល់ ១០ ០០០ គ្រឿង»។
យោងតាម លោក ង៉ន សាំង រោងចក្រនេះនឹងដំឡើងយីហោរថយន្ត ២ របស់ក្រុមហ៊ុន Ford គឺយីហោ Ford Ranger និង Ford Everest។ «រថយន្ត Ford Brand ជាប់ចំណាត់ថ្នាក់លេខ ១ ក្នុងរយៈពេលជាច្រើនឆ្នាំជាប់ៗគ្នានៅក្នុងទីផ្សារ ខណៈចំណែកទីផ្សាររបស់ខ្លួនមាន ៤៥ ភាគរយនៃរថយន្តយីហោថ្មីសរុប»៕
