ឆ្នាំ ២០២១ ផលិតកម្មដំណាំកសិកម្ម សរុបមានប្រមាណ $ ១០ ៥៦៧ លាន
ភ្នំពេញ ៖ ផលិតកម្មដំណាំកសិកម្មសម្រាប់ឆ្នាំ ២០២១ សរុបមានប្រមាណ $១០ ៥៦៧ លាន កើនលើសឆ្នាំ ២០២០ ចំនួន ៣៣,១៥% ។ នេះបើយោងតាមការអោយដឹងរបស់រដ្ឋមន្ត្រីក្រសួងកសិកម្ម។
ក្នុងចំណោមផលពីវិស័យកសិកម្មខាងលើនេះ មានតម្លៃទទួលបានពីការនាំចេញកសិផលមានវិញ្ញាបនបត្រ មានចំនួន $ ៣ ៩៥៨ លាន កើនលើសឆ្នាំ ២០២០ ចំនួន ១០៥,៤៣% តម្លៃទទួលបានពីការនាំចេញកសិផលគ្មានវិញ្ញាបនបត្រ មានចំនួន $៩៥៩ លាន ថយចុះចំនួន ៣៦,២៩% ធៀបឆ្នាំ ២០២០ និងតម្លៃទទួលបានពីកសិផលដែលសល់សម្រាប់ប្រើប្រាស់ក្នុងស្រុក មានចំនួន $៥ ៦៤៨ លាន កើនលើសឆ្នាំ ២០២០ ចំនួន ២៥,៤៥% ។
លោក វេង សាខុន រដ្ឋមន្ត្រីក្រសួងកសិកម្ម ឲ្យដឹងថា នៅឆ្នាំ ២០២១ កន្លងទៅនេះ កម្ពុជាសម្រេចផលិតកម្មដំណាំកសិកម្មនៅទូទាំងប្រទេសទទួលបានសរុបចំនួន ៣៥ ៩៧៤ ១៣៨ តោន កើនឡើងចំនួន ២៣% ធៀបនឹងឆ្នាំ ២០២០ ក្នុងនោមានដំណាំស្រូវ មានចំនួន ១២ ២០៦ ៩១១ តោន កើនឡើងចំនួន ១១,៦៣% ធៀបនឹងឆ្នាំ ២០២០ ដែលមានបរិមាណចំនួន ១០ ៩៣៥ ៦១៨ តោន ។
ទោះយ៉ាងនេះកសិករជាច្រើននៅឆ្នាំនេះត្អូញថាការចំណាយលើការដាំដុះឆ្នាំនេះកើនឡើងដោយសារ ជីកសិកម្ម ថ្នាំកសិកម្ម បានឡើងថ្លៃពី ៣ ទៅដង ៤ ចំណែកផលិតផលពិសេសនៅតំបន់ខ្លះបានធ្លាក់ថ្លៃ ។
កសិកររស់នៅក្នុងស្រុកភ្នំស្រុក ខេត្តបន្ទាយមានជ័យ លោក មឿន និយាយថា នៅពេលនេះលោកបានទុកដីស្រែជាង ២ ហិកតាចោលមិនដាំដុះដោយសារជីឡើងថ្លៃពេកចំណែកស្រូវបើចុះថោកទៅវិញ នាំការធ្វើស្រែឆ្នាំនេះលោកគិតថា មិនចំណេញនោះឡើយ ។ កសិកររូបនេះ អះអាងថា កសិករជាច្រើនក្នុងមូលដ្ឋានរបស់គាត់បានទុកដីចោលមិនដាំដុះដូចលោកដែរ ។
នៅក្នុងរបាយការណ៍របស់លោក វេង សាខុន ក្រៅពីដំណាំស្រូវ ដែលមានទិន្នផលកើននោះ ដំណាំសាកវប្បកម្ម និងដំណាំឧស្សាហកម្ម ក៍ទទួលកំណើនផងដែរ បើធៀបឆ្នាំ ២០២០ ៕
