មន្ត្រីជាន់ខ្ពស់ក្រសួងបរិស្ថាន ៖ ពលរដ្ឋកម្ពុជា និងពិភពលោកនឹងបានស្គាល់ច្បាស់បន្ថែមទៀតពីការអភិវឌ្ឍនៅខេត្តព្រះសីហនុ និងសក្តានុពលដ៏សម្បូណ៌បែប

ព្រះសីហនុ៖ មន្ត្រីជាន់ខ្ពស់ក្រសួងបរិស្ថាន សម្តែងនូវសុទិដ្ឋិនិយមថា ពលរដ្ឋកម្ពុជា និងពិភពលោកនឹងបានស្គាល់ច្បាស់បន្ថែមទៀតពីការអភិវឌ្ឍនៅខេត្តព្រះសីហនុ និងសក្តានុពលដ៏សម្បូណ៌បែបនៃខេត្តជាប់មាត់សមុទ្រមួយនេះដែលរាជរដ្ឋាភិបាលកម្ពុជាបាននិងកំពុងប្រែក្លាយទៅជាតំបន់សេដ្ឋកិច្ចពិសេសគំរូពហុបំណងដែលជាប៉ូលសេដ្ឋកិច្ចមួយយ៉ាងសំខាន់របស់កម្ពុជា និងភ្ជាប់កម្ពុជាទៅកាន់ពិភពលោកកាន់តែទូលាយ។

ថ្លែងក្នុងឳកាសអ្នកសារព័ត៌មានសរុបចំនួន ៣០ រូបមកពី ១៦ ស្ថាប័នព័ត៌មាននៅកម្ពុជាបានចូលរួមក្នុងដំណើរទស្សនកិច្ចសារព័ត៌មានរយៈពេល ៥ ថ្ងៃនេះ ចាប់ពីថ្ងៃទី២៨ ខែវិច្ឆិកា ដល់ថ្ងៃទី២ ខែធ្នូ ឆ្នាំ២០២១ នៅលើទឹកដីខេត្តព្រះសីហនុដើម្បីផ្សព្វផ្សាយពីសមិទ្ធផលនានាដែលរាជរដ្ឋាភិបាលកម្ពុជាសម្រេចបាននៅខេត្តជាប់មាត់សមុទ្រមួយនេះ ក៏ដូចជាផ្សព្វផ្សាយពីសក្តានុពលទេសចរណ៍ ព្រមទាំងធនធានធម្មជាតិ និងជីវៈចម្រុះនៅតំបន់សមុទ្រ និងមហាសន្និបាតសមុទ្រអាស៊ីបូព៌ាលើកទី៧។

លោក នេត្រ ភក្ត្រា បានអោយដឹងថា ដំណើរទស្សនកិច្ចនេះ ក្រុមអ្នកសារព័ត៌មាននឹងមានឱកាសស្វែងយល់បន្ថែមពីសក្តានុពលទេសចរណ៍ សក្តានុពលសេដ្ឋកិច្ច ហេដ្ឋារចនាសម្ព័ន្ធដែលខេត្តព្រះសីហនុ ព្រមទាំងធ្វើទស្សនកិច្ច នៅតាមទីតាំងនានាដូចជាបណ្តោយឆ្នេរសមុទ្រដ៏ស្រស់ស្អាតរបស់ខេត្តព្រះសីហនុ ហេដ្ឋារចនាសម្ព័ន្ធផ្លូវ ៣៤ ខ្សែដែលរាជរដ្ឋាភិបាលបានសាងសង់សម្រាប់ធ្វើទំនើបកម្មខេត្តព្រះសីហនុ ទីតាំងអាងប្រព្រឹត្តកម្មទឹកកខ្វក់ ដែលមានតួនាទីសម្អាតសំណល់រាវទឹកកខ្វក់ក្រុងព្រះសីហនុ ទីលានចាក់សំណល់រឹងសំរាមខេត្តព្រះសីហនុក្នុងការគ្រប់គ្រងសំណល់រឹងសំរាម រួមនឹងការគ្រប់គ្រងនិងអភិរក្សឆ្នេរសមុទ្រកម្ពុជាផងដែរ។

អ្នកនាំពាក្យក្រសួងបរិស្ថាន បន្ថែមថា ដំណើរទស្សនកិច្ចនេះមានគោលបំណងបង្ហាញឱ្យសាធារណជនបានឃើញពីភាពជាអ្នកដឹកនាំរបស់កម្ពុជាក្រោមការដឹកនាំរបស់ប្រមុខរដ្ឋាភិបាល ដែលកម្ពុជាមានសមត្ថភាពនិងលទ្ធភាពគ្រប់គ្រាន់ក្នុងការរៀបចំ និងការដឹកនាំមហាសន្និបាតអន្តរជាតិនិងបានឃើញពីវឌ្ឍនភាព ព្រមទាំងសមិទ្ធផលនៃការអភិវឌ្ឍនិងការអភិវឌ្ឍតំបន់ឆ្នេរសមុទ្ររបស់កម្ពុជា បង្ហាញពីការអភិវឌ្ឍប្រកបដោយនិរន្តរភាពនៃតំបន់ឆ្នេរសមុទ្រកម្ពុជា ជាពិសេសខេត្តព្រះសីហនុដែល រាជរដ្ឋាភិបាលកម្ពុជាបានប្រែក្លាយទៅជាតំបន់សេដ្ឋកិច្ចពិសេសគំរូពហុបំណង។

លោកថា កម្ពុជាបានត្រៀមខ្លួនរួចជាស្រេចធ្វើជាម្ចាស់ផ្ទះរៀបចំមហាសន្និបាតសមុទ្រអាស៊ីបូព៌ាលើកទី៧ ហើយ កម្ពុជាបានជ្រើសរើសយកខេត្តព្រះសីហនុជាទីកន្លែង ដើម្បីប្រារព្ធមហាសន្និបាតសមុទ្រអាស៊ីបូព៌ាឆ្នាំ២០២១ និងកិច្ចប្រជុំពាក់ព័ន្ធដែលគ្រោងធ្វើនាថ្ងៃទី១-២ ខែធ្នូ ឆ្នាំ២០២១។

ក្នុងរយៈពេលចុងក្រោយនេះ ខេត្តព្រះសីហនុបានប្រែមុខមាត់ជាច្រើនដោយប្រែក្លាយពីខេត្តដែល ស្ងៀមស្ងាត់ទៅជាខេត្តដែលមានសកម្មភាពមមាញឹក និងរស់រវើកលើវិស័យទេសចរណ៍ សេដ្ឋកិច្ច និងឧស្សាហកម្ម៕