សមាគមអាជីវករសេដ្ឋកិច្ចក្រៅប្រព័ន្ធដេីម្បីសន្តិភាព ប្រគល់ថវិកាមូនិធិសង្គ្រោះជូនក្រុមគ្រួសារសមាជិក ដែលបានទទួលមរណភាពកន្លងមកសរុប០៧គ្រួសារ
(ភ្នំពេញ) ៖ វេលាម៉ោង០៥:៣០នាទីល្ងាច ថ្ងៃចន្ទ ទី០៦ ខែកញ្ញា ឆ្នាំ២០២១នេះ សមាគមអាជីវករសេដ្ឋកិច្ចក្រៅប្រព័ន្ធដេីម្បីសន្តិភាព ដែលមានលោក កៀង ល័ក្ស អភិបាលរងខណ្ឌកំបូលជាប្រធានកិត្តិយស និងដឹកនាំដោយលោក ហ៊ាង វិទ្យា ជាប្រធាន បានរៀបចំកម្មវិធីប្រគល់ថវិកាមូនិធិសង្គ្រោះជូនក្រុមគ្រួសារសមាជិក ដែលបានទទួលមរណភាពកន្លងមកសរុប៧គ្រួសារ ដែលកម្មវិធីនេះប្រព្រឹត្តឡេីងនៅស្នាក់ការកណ្តាលស្ថិតនៅភូមិ សង្កាត់ចោមចៅ២ ខណ្ឌពោធិ៍សែនជ័យ រាជធានីភ្នំពេញ។
នាឱកាសនោះដែរលោក កៀង ល័ក្ស អភិបាលរងខណ្ឌកំបូលជាប្រធានកិត្តិយសបានពាំនាំនូវការផ្តាំសាកសួរសុខទុក្ខ និងចូលរួមរំលែកទុក្ខពីសំណាក់ឯកឧត្ដម ឃួង ស្រេង អភិបាលនៃគណ:អភិបាលរាជធានីភ្នំពេញ តែងតែយកចិត្តទុកដាក់ជាប់ជានិច្ចចំពោះសុខទុក្ខបងប្អូនអ្នករត់កង់បីគ្រប់គ្នាៗ
ជាមួយគ្នានេះដែរ លោកអភិបាលរងខណ្ឌ បានអំពាវនាវដល់បងប្អូនអ្នករត់កង់បី ទាំងអស់ខិតខំយកចិត្តទុកដាក់គិតគូរជានិច្ចពី សុខភាព អនាម័យ និងសុវត្ថិភាពផ្ទាល់ខ្លួន តាមរយៈការចូលរួមអនុវត្តវិធានការការពារ និង រក្សាអនាម័យ ជាពិសេសអនុវត្តតាមអនុសាសន៍ដ៍ខ្ពង់ខ្ពស់បំផុត របស់សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា នូវវិធានការ ៣ការពារ និង ៣កុំ ក៍ដូចជាសារអប់រំនានារបស់ក្រសួងសុខាភិបាល ដើម្បីចូលរួមកាត់បន្ថយ និង បង្ការការរីករាលដាលនៃជំងឺកូវីដ-១៩ ដែលកំពុងតែកើតមាននៅសហគមន៍នាពេលនេះ ។ម្យ៉ាងទៀត សូមកុំប្រមូលផ្តុំ ជួបជុំគ្នា ហើយ ប្រសិនបើគ្មានការចាំបាច់ទេ សូមបងប្អូនកុំចេញក្រៅផ្ទះអោយសោះដើម្បី ជៀសវាង ការរីករាលដាលឆ្លងកីវីដ-១៩ ។
សូមបញ្ជាក់ជូនផងដែរថាថវិការដែលប្រមូលបានពីបងប្អូនសាជិក-សាមាជិកា ទាំងអស់គឺទទួលបាន ១៩.១៧៥.០០០រៀល ដែលថវិកាទាំងអស់នេះគឺសុទ្ធតែជាការចូលរួមនឹងទឹកចិត្តរបស់សមាជិកក្នុងសមាគមទាំងអស់តែម្តង។
