បុរសវៀតណាមម្នាក់ត្រូវជាប់ពន្ធនាគាររយៈពេល ១៨ខែ ពីបទចម្លងជំងឺកូវីដ១៩ ទៅកាន់សង្សារ និងអ្នករួមការងាររបស់នាង

វៀតណាម៖ បុរសម្នាក់ត្រូវបានព្រះរាជអាជ្ញានៅក្នុងខេត្ត Hai Duong សម្រេចបង្គាប់ឱ្យជាប់ពន្ធនាគាររយៈពេល ១៨ខែ បន្ទាប់ពីគាត់បានលួចឆ្លងដែនចូលប្រទេសវៀតណាមពីប្រទេសឡាវ ហើយបានចម្លងជំងឺ COVID-19 ទៅដល់មនុស្ស ២ នាក់ផ្សេងទៀត នេះបើតាមការចុះផ្សាយរបស់សារព័ត៌មានVNexpress នៅថ្ងៃសៅរ៍ ទី១៧ ខែកក្កដា ឆ្នាំ២០២១។ បុរសម្នាក់នោះមានឈ្មោះថា Dao Duy Tung អាយុ ៣២ឆ្នាំ ហើយគាត់ត្រូវជាប់ពន្ធនាគារពីបទ«ចម្លងជំងឺឆ្លងដ៏គ្រោះថ្នាក់» ទៅកាន់មិត្តស្រី និងមិត្តរួមការងាររបស់នាង។

ព្រះរាជអាជ្ញារបស់ប្រទេសវៀតណាមបាននិយាយថា បុរសរូបនេះបានលួចចេញទៅប្រទេសឡាវកាលពីថ្ងៃទី០៥ ខែមេសា ឆ្នាំ២០២១ ប៉ុន្តែមិនអាចរកការងារធ្វើនៅទីនោះបាន ដោយសារតែវិបត្តិនៃជំងឺ COVID-19 ហើយក៏បានសម្រេចលួចត្រឡប់មកប្រទេសវៀតណាមវិញ តាមរយៈរថយន្តកុងតឺន័រនៅខែដដែលនោះផ្ទាល់។ រហូតមកដល់ថ្ងៃទី៣០ ខែមេសា បងប្អូនរបស់គាត់នៅឯប្រទេសឡាវបានឱ្យដំណឹងថា មនុស្សម្នាក់ដែលគាត់បានប៉ះពាល់នៅប្រទេសឡាវ គឺបានវិជ្ជមានជាមួយជំងឺ COVID-19 ដូច្នេះគាត់គួរតែទៅធ្វើតេស្ដរកជំងឺ COVID-19 ។

យ៉ាងណាឈ្មោះ Dao Duy Tung មិនបានធ្វើតាមបងប្អូនណែនាំទេ ហើយថែមទាំងបន្ដស្នាក់នៅជាមួយមិត្តស្រីនៅក្រុង Hai Phong និងដើរលេងទៅតំបន់ចំនួន ៥ ផ្សេងទៀត។ ក្រោយមកគាត់បានចេញរោគសញ្ញាជំងឺ COVID-19 ហើយមិត្តស្រីរបស់គាត់ក៏បានប្រាប់ឱ្យគាត់ទៅធ្វើតេស្ដ ប៉ុន្តែគាត់នៅតែប្រកែកដដែលៗ និងពន្យារពេលដល់ថ្ងៃទី០៤ ខែឧសភា។ ក្រោយមកគាត់បានតេស្ដវិជ្ជមានជំងឺ COVID-19 នៅពេលត្រឡប់មកផ្ទះនៅ Hai Duong ហើយមិត្តស្រីគាត់និងមិត្តរួមការងាររបស់នាង ក៏បានវិជ្ជមានជាមួយជំងឺនេះដូចគ្នា។

អាជ្ញាធរនៅក្រុង Hai Phong បានចំណាយប្រាក់ប្រមាណ ៤០,០០០ ដុល្លារ (៩០០លានដុង) នៅក្នុងការតាមរក និងតេស្ដរកជំងឺ COVID-19 ដល់អ្នកដែលបានប៉ះពាល់គាត់ ខណៈអាជ្ញាធរនៅខេត្ត Hai Duong ក៏បានចំណាយអស់ ២.៤ពាន់លានដុង (១០០,០០០ដុល្លារ) សម្រាប់កិច្ចខិតខំទប់ស្កាត់ និងការពារជំងឺ COVID-19 ដែលបណ្ដាលមកពីភាពមិនទទួលខុសត្រូវរបស់គាត់។ យ៉ាងការពិន័យជាប្រាក់សម្រាប់គាត់ត្រូវបានលើកលែក ដោយសារគាត់គ្មានការងារធ្វើ និងគ្មានផ្ទះសម្បែងច្បាស់លាស់៕