តើតួ Thor នឹងចាកចេញពីផលិតកម្ម MCU បន្ទាប់ពីបញ្ចប់រឿង Avengers: Endgame ទេ?

បរទេស៖ លោក Chris Hemsworth ដែលមនុស្សម្នាស្គាល់លោកថា «Thor» នោះ ថ្មីៗនេះលោកត្រូវបានក្រុមសារព័ត៌មានបរទេសមួយបានចោទជាសំណួរថា តើលោកនឹងចាកចេញពីផលិត MCU (ឈប់សម្តែងដើរតួធ្វើជា Thor) បន្ទាប់ពីបញ្ចប់ការថតរឿង Avengers: Endgame ទេ?

តារាវ័យ ៣៥ឆ្នាំ មានស្រុកកំណើតនៅក្នុងប្រទេសអូស្រ្តាលីម្នាក់នេះបាននិយាយថា ជោគវាសនារបស់តួអង្គនៅក្នុងរឿង Marvel អាស្រ័យទៅលើខាងផលិតកម្មជាអ្នកសម្រេច។

«គង់តែមានថ្ងៃណាមួយនោះទេ អាចជាពេលឥឡូវ ឬក្នុងថ្ងៃអនាគត។ ខ្ញុំមិនដឹងនោះទេ… តើអ្នកណាទៅដឹងថាអនាគតគឺជាអ្វីនោះ។ ខ្ញុំមិនដឹងដែរ យើងអាចសម្តែងដើរតួសាជាថ្មីម្តងទៀត ឬថត.តភាគ ឬក៏ថតថយក្រោយនៃសាច់រឿងវិញក៏ថាបានដែរ។ តើអ្នកណាទៅដឹងនោះ? វាអាស្រ័យទៅលើខាងផលិតកម្មជាអ្នកសម្រេចតែប៉ុណ្ណោះ។» (សម្តីរបស់លោក Hemsworth)

គួររម្លឹកផងដែរថា តារារូបស្រស់ សាច់ដុំធំម្នាក់នេះ បានសម្តែងដើរតួជាវីរបុរសរបស់រឿង Marvel ដំបូងនៅក្នុងឆ្នាំ២០១១ ដោយពេលនោះលោកដើរតួសម្តែងធ្វើជា Thor នៅក្នុងខ្សែភាពយន្ត Thor។ លោកបានដើរតួសម្តែងធ្វើជា Thor សរុបអស់ចំនួន ៧រឿងមកហើយ ដោយរួមទាំងសាច់រឿងចុងក្រោយ Avengers: Endgame នេះផងដែរ។

លោក Hemsworth បាននិយាយថាតួអង្គនេះ ពិតជាឱកាសដ៏កម្រនិងវិសេសវិសាលសម្រាប់លោកពិតមែន ហើយអ្នកដែលសម្តែងកុនជាមួយលោកនោះ ពួកគេបានក្លាយទៅជាក្រុមគ្រួសាររបស់លោកទៅហើយ។

ជាចុងក្រោយ លោក Hemsworth បាននិយាយថា វាពិតជាអារម្មណ៍ដ៏ពិសេសនិងអស្ចារ្យពិតមែន។ លោកគ្រាន់តែមានសេចក្តីអំណរចំពោះអ្វីដែលលោកមាននិងបទពិសោធន៍ដែលលោកទទួលបានកន្លងមកនេះតែប៉ុណ្ណោះ៕

Copy Right By Run JI No