Boy ទទួលស្គាល់ មិនសូវជិតស្និទ្ធនឹងMargieដូចមុន សង្ឃឹមថា នាងយល់ពីហេតុផល ដែលលោកមិនទាន់បានទៅសួរសុខទុក្ខ!

ថៃ៖ តារាសម្តែងប្រុសពូកែវោហារលោកBoy Pakorn ដែលប្រិយមិត្តប្រាកដជាស្គាល់ច្បាស់ ព្រោះលោកជាតារាប្រុសដែលមានឈ្មោះល្បីល្បាញមួយរូបប្រចាំប្រទេស។ បើរំលឹកទៅកាលពីបួន ប្រាំឆ្នាំមុនBoy និងតារាសម្តែងស្រីMargie Rasri ជាដៃគួសម្តែងដែលទទួលបានការគាំទ្រយ៉ាងខ្លាំងពីសំណាក់ទស្សនិកជន។

ក្រៅពីជាដៃគូសម្តែងដ៏ជោគជ័យBoy និងMargieថែមទាំងជាមិត្តភក្តិជិតស្និទ្ធនឹងគ្នា រហូតដល់មានអ្នកគាំទ្រមួយចំនួនគិតថាពួកគេទាំងពីរ មានទំនាក់ទំនងស្នេហាក្រៅឆាកជាមួយគ្នាថែមទៀតផង។

ប៉ុន្តែមួយរយៈក្រោយនេះBoy និងMargieហាក់ដូចជាមិនសូវមានការងាររួមគ្នានោះទេ។ ដោយមួយរយៈមុនថែមទាំងមានលេចលឺព័ត៌មានថាពួកគេទាំងពីរបានឈ្លោះគ្នាទៀតផង។ ហើយសូម្បីតែMargieសម្រាលកូនរហូតមកដល់ពេលនេះ ក៏ Boyមិនទាន់បានទៅសួរសុខទុក្ខនៅឡើយដែរ។ ចំពោះចំណុចនេះធ្វើឲ្យអ្នកគាំទ្រកាន់តែមានការសង្ស័យថា តើពួកគេមានបញ្ហានឹងគ្នាពិតមែនឬក៏យ៉ាងណា?

ជាក់ស្តែងទាក់ទងនឹងរឿងនេះBoyបានបកស្រាយយ៉ាងដូចច្នោះថា៖

« ចាំរកពេលទំនេរព្រោះពេលនេះខ្ញុំរវល់ច្រើន ក្នុងខែនេះខ្ញុំត្រូវទៅក្រៅប្រទេសច្រើនដង។ តែក៏សប្បាយចិត្តដែលឃើញMargieសម្រាលកូនភ្លោះដ៏គួរឲ្យស្រលាញ់ដោយសុវត្ថិភាព។

ពួកយើងទាំងពីរមិនសូវបានជួបគ្នាញឹកញាប់ដូចមុន បញ្ហាគឺដោយសារតែរឿងពេលវេលា ប៉ុន្តែខ្ញុំគិតថាដូចជា មិនចាំបាច់អីត្រូវពិសោធន៍ទេថាពួកយើងនៅដូចមុនឬយ៉ាងណា។ ដូចថ្ងៃដែលMargieរៀបការ ខ្ញុំបានទៅចូលរួមតែគ្រប់គ្នាបែរជាគិតថា ខ្ញុំទៅដើម្បីបិទបាំងព័ត៌មាន ដែលនិយាយថាពួកយើងឈ្លោះគ្នាទៅវិញ ដែលនេះមិនមែនជាការពិតទាល់តែសោះ គឺខ្ញុំគ្រាន់តែចង់ទៅអបអរសាទរប្អូនតែប៉ុណ្ណោះ។

ដូចពេលនេះអញ្ចឹងMargieសម្រាលកូន ខ្ញុំក៏បានចូលរួមអបអរសាទរដោយផ្ញើសារតាមអ៊ីនស្តារក្រាម ប៉ុន្តែមិនទាន់មានឱកាសបានមើលផ្ទាល់នៅឡើយទេ។ ម្យ៉ាងទៀតខ្ញុំក៏បានផ្ញើសារតាមLineទៅដូចគ្នា តែខ្ញុំក៏មិនច្បាស់ដែរថាMargieបានប្តូរLineឬក៏អត់ ព្រោះសារដែលខ្ញុំផ្ញើទៅនាងមិនទាន់បានអានទេ ប៉ុន្តែខ្ញុំគិតថានាងប្រហែលជាប្តូរLineហើយ»។

ចំណែកឯរឿងបេះដូងវិញBoyប្រាប់ថា នៅមិនទាន់មានអ្នកណាទេ ពេលនេះលោកកំពុងតែចាប់អារម្មណ៍ ជាមួយការដើរលេងក្រៅប្រទេសម្នាក់ឯងច្រើនជាង៕