លោក ពេជ្រ ស្រស់ ៖គម្រោងធ្វើផ្ទះជូនក្មួយប្រុញត្រូវការថវិកាជាង៥០០០$ខណៈគិតត្រឹមព្រឹកនេះថវិកាទទួលបានពីសប្បុរសជនមានជាង២០០០$

ភ្នំពេញ៖ លោក ពេជ្រ ស្រស់ ប្រធានគណបក្សយុវជនកម្ពុជា និងជាសមាជិកឧត្តមក្រុមប្រឹក្សាពិគ្រោះ និងផ្ដល់យោបល់បានបង្ហាញគំរូប្លង់ផ្ទះគម្រោងថវិកាចំណាយសម្រាប់ធ្វើផ្ទះជូនក្មួយប្រុញគឺត្រូវការថវិកាជាង៥០០០$ខណៈគិតត្រឹមព្រឹកនេះថវិកាទទួលបានពីសប្បុរសជនមានជាង២០០០$តែប៉ុណ្ណោះ។

គួរជម្រាបជូនថា បន្ទាប់ពី លោក ពេជ្រ ស្រស់ ប្រកាសជួយធ្វើផ្ទះសមរម្យមួយឲ្យក្រុមគ្រួសារនាយប្រុញដែលកំពុងមានជីវភាពក្រីក្រខ្លាំង ស្រាប់តែមានមហាជន និងសប្បុរសជនជាច្រើនបានចូលរួមជាថវិកាជាបន្តបន្ទាប់ តាមរយៈលោក ពេជ្រ ស្រស់ ឬ ផ្ញើទៅកាន់គ្រួសារនាយប្រុញផ្ទាល់ផងដែរ។

លោក ពេជ្រ ស្រស់ ប្រធានគណបក្សយុវជនកម្ពុជា បានអះអាងតាមគេហទំព័រហ្វេសប៊ុកនៅព្រឹកថ្ងៃទី២២មីនានេះថា «ប្រុញ អើយ ប្រុញ  ផ្ទះថ្មីរបស់ក្មួយនឹងបានឆាប់ ៗនេះហើយ ដោយឥឡូវបងប្អូនដែលអាណិតក្មួយបានរួមគ្នាជួយក្មួយមានទឹកប្រាក់ គឺជាង 2000$ហើយ ក៏មានបងប្អូនកំពុងផ្ញើជួយក្មួយទៀតដែរ។

ដោយក្មួយប្រុញធ្វើឲ្យយើងមានសំណើច ដូច្នេះយើងរួមគ្នាបង្កើតសំណើចឲ្យក្មួយប្រុញវិញទៅ

ម្នាក់បន្តិចដើម្បីស្នាមញញឹមក្មួយប្រុញ។លេខABAខ្ញុំ 070777771 => PICH SROS

បញ្ជាក់គម្រោងធ្វើផ្ទះជូនក្មួយប្រុញត្រូវការថវិកាប្រមាណជាង5000$ ដូចរូបដែលបានបង្ហោះ»។

សូមរំលឹកថា ក្រោយឃើញពីទុក្ខលំបាករបស់ក្រុមគ្រួសារ  នាយប្រុញដែលមានឪពុកជាជនពិការផងនោះ  កាលពីថ្ងៃទី២១មីនាម្សិលមិញ លោក ពេជ្រ ស្រស់់ ប្រធានគណបក្សយុវជនកម្ពុជានិងជាសមាជិកឧត្តមក្រុមប្រឹក្សាពិគ្រោះនិងផ្ដល់យោបល់ប្រកាសជួយធ្វើកូនផ្ទះជូនពួកគាត់ឲ្យបានសមរម្យជាងផ្ទះគាត់បច្ចុប្បន្ននេះ៕