MV “Kill This Love” របស់ BLACKPINK ត្រូវបានហាមឃាត់មិនឲ្យចាក់ផ្សាយលើប៉ុស្តិ៍ទូរទស្សន៍ KBS ព្រោះតែខុសច្បាប់ចរាចរណ៍ផ្លូវគោក

កាលពីថ្មីៗនេះបទ “Kill This Love” ពីក្រុមចម្រៀងនារី BLACKPINK ហាក់ទទួលបានការចាប់អារម្មណ៍ និងគាំទ្រជាខ្លាំងពីសំណាក់ប្រិយមិត្តជុំវិញពិភពលោក ដោយចម្រៀងមួយបទនេះបានបំបែកកំណត់ត្រាជាច្រើន។ យ៉ាងណាមិញស្រាប់តែមុននេះបន្តិច តាមរយៈប្រភពព័ត៌មាន All KPOP បានឲ្យដឹងថាចម្រៀងមួយបទនេះត្រូវបានហាមឃាត់មិនឲ្យផ្សព្វផ្សាយនៅលើប៉ុស្តិ៍ទូរទស្សន៍ KBS ដែលជាប្រព័ន្ធផ្សព្វផ្សាយធំមួយនៃប្រទេសកូរ៉េ។

ប្រិយមិត្តអ្នកនិយមតាមដានទស្សនាពី KPOP មុខជាដឹងច្បាស់ជាក់ជាមិនខានថា KBS ជាប៉ុស្តិ៍ទូរទស្សន៍មួយដែលមានច្បាប់កំណត់តឹងរឹងបំផុត ជាពិសេសលើការផ្សព្វផ្សាយតែម្តង ដោយជាច្រើនលើកច្រើនសារមកហើយដែល KBS បានធ្វើការហាមឃាត់មិនឲ្យមានការផ្សាយចម្រៀង ដែលមានអត្ថន័យមិនសមរម្យ ក្បាច់រាំសិចស៊ី ឬក៏ការបំពានច្បាប់ណាមួយ។ ជាក់ស្តែងដូចជាបទ “Kill This Love” ពីក្រុមចម្រៀង BLACKPINK គឺត្រូវហាមមិនឲ្យចាក់នៅប៉ុស្តិ៍ទូរទស្សន៍មួយនេះព្រោះតែ MV នេះបានបំពានលើច្បាប់ចរាចរណ៍ផ្លូវគោករបស់កូរ៉េ ត្រង់ឈុតដែល Rosé បើកឡានដោយពុំមានពាក់ខ្សែក្រវ៉ាត់ការពារ។ ក្រៅពីបទនេះ KBS ក៏បានបិទមិនឲ្យផ្សាយនូវបទមួយចំនួនទៀតដូចជាបទ “4:44” របស់ Park Bom, “Focus” របស់ Kim Dong Han និង “Ready Q” របស់ Cho Jung Min ជាដើម។ ដោយខាង KBS តម្រូវឲ្យពួកគេធ្វើការកែប្រែឡើងវិញ និងដាក់ស្នើសុំផ្សព្វផ្សាយម្តងទៀត បើមិនអញ្ចឹងទេចម្រៀងរបស់ពួកគេ នឹងមិនត្រូវបានផ្សព្វផ្សាយលើប៉ុស្តិ៍ទូរទស្សន៍មួយនេះជាដាច់ខាត៕