ពេលនេះក្រុមហ៊ុន AirAsia Japan មួយទៀតហើយសម្រេចដាក់ពាក្យក្ស័យធន ក្រោយស៊ូលែងរួចក្នុងវិបត្តិកូវីដ
យោងតាមការចេញផ្សាយរបស់សាព័ត៌មាន NHK បានឲ្យដឹងថា ក្រុមហ៊ុនអាកាសចរណ៍ AirAsia Japan បានសម្រេចដាក់ពាក្យក្ស័យធនកាលពីថ្ងៃអង្គារ ទី១៧ ខែវិច្ឆិកា ម្សិលមិញនេះ ដោយសារតែរងផលប៉ះពាល់ដោយវីរុស Covid-19។ តាមប្រភពដដែលក្រុមហ៊ុនអាកាសចរណ៍នេះ បានចាប់ផ្តើមប្រតិបត្តិការនៅឆ្នាំ២០១៧ ដែលជាការបណ្តាក់ទុនរួមគ្នារវាងក្រុមហ៊ុនអាកាសចរណ៍ AirAsia Group ដែលមានមូលដ្ឋាននៅប្រទេសម៉ាឡេស៊ី និងដៃគូជប៉ុន។
ការផ្លាស់ប្តូរនេះបានកើតឡើងបន្ទាប់ពីក្រុមហ៊ុនអាកាសចរណ៍បាននិយាយកាលពីខែមុនថា ខ្លួនកំពុងបញ្ចប់ប្រតិបត្តិការទាំងអស់របស់ខ្លួន នៅពេលដែលតម្រូវការអ្នកដំណើរបានធ្លាក់ចុះ។ ជាមួយគ្នានេះក្រុមហ៊ុនត្រូវប្រឈមនឹងបំណុលប្រហែល ២០៧ លានដុល្លារហើយបានផ្អាករាល់ជើងហោះហើរទាំងអស់។ គួរបញ្ជាក់ផងដែរថា ក្រុមហ៊ុនអាកាសចរណ៍ AirAsia Japan បានបើកជើងហោះហើរក្នុងស្រុកចំនួន ៣ ពីអាកាសយានដ្ឋានមួយនៅកណ្តាលប្រទេសជប៉ុន ក៏ដូចជាជើងហោះហើរទៅកាន់តៃប៉ិក្នុងកោះតៃវ៉ាន់៕
