កិច្ចប្រជុំផ្សព្វផ្សាយស្តីពីការបញ្រ្ជាបការយល់ដឹង និងការប្រយុទ្ធប្រឆាំងគ្រឿងញៀនក្នុងវិស័យទេសចរណ៍
(ព្រៃវែង)៖ រសៀលថ្ងៃទី២៣ ខែមេសា ឆ្នាំ២០១៩ នៅសាលប្រជុំសាលាខេត្តព្រៃវែង បានបេីកកិច្ចប្រជុំផ្សព្វផ្សាយស្តីពីការបញ្រ្ជាបការយល់ដឹង និងការប្រយុទ្ធប្រឆាំងគ្រឿងញៀនក្នុងវិស័យទេសចរណ៍ ក្រោមអធិបតីភាពឯកឧត្តម ឌុច គន្ធា អភិបាលរង ប្រធានលេខាធិការដ្ឋានគណកម្មាធិការត្រួតពិនិត្យគ្រឿងញៀនខេត្តព្រៃវែង និងឯកឧត្តម ចិន សាម៉ុន ទីប្រឹក្សា តំណាងឯកឧត្តម បណ្ឌិត ថោង ខុន រដ្ឋមន្ត្រី ក្រសួងទេសចរណ៍ ដោយមានការចូលរួមពីមន្ទីរអង្គភាពជាសមាជិកគណកម្មាធិការត្រួតពិនិត្យគ្រឿងញៀនខេត្ត និងម្ចាស់ អ្នកគ្រប់គ្រងអាជីវកម្ម សេវាទេសចរណ៍ នៅសាលប្រជុំសាលាខេត្តព្រៃវែង។
លោក ទឹម ទេពវង្សា ប្រធានមន្ទីរទេសចរណ៍ បានស្វាគមន៍ និងរបាយការណ៍ពីការងារដែលមន្ទីរក្នុងនាមសមាជិករបស់គណកម្មាធិការត្រួតពិនិត្យគ្រឿងញៀនខេត្តដែលកន្លងមកបានខិតខំជាមួយនឹងចូលរួមយ៉ាងសកម្មពីអង្គភាពពាក់ព័ន្ធនិងប្រតិបត្តិករទេសចរណ៍លេីការងារប្រយុទ្ធប្រឆាំងគ្រឿងញៀនក្នុងខេត្ត។
ក្នុងឱកាសនោះ លោក លឹម តុងហួត ប្រធាននាយកដ្ឋាននីតិកម្ម អប់រំ និងស្តារនីតិសម្បទា និងលោក ឡោ សុវិជ្ជា អគ្គនាយករង សុទ្ធតែបានលេីកឡេីងដោយលេីកយកបទពិសោធន៍ពីបញ្ហានិងផលវិបាកផ្សេងៗដែលនឹងអាចកេីតឡេីងក្នុងទីតាំងអាជីវកម្មសេវាទេសចរណ៍របស់លោកអ្នកប្រសិនបេីលោកអ្នកមិនបានស្វែងយល់ឬមិនបានទទួលព័ត៌មានពីបញ្ហាគ្រឿងញៀន។
ក្នុងឱកាសនោះ ឯកឧត្ដម ឌុច គន្ធា អភិបាលរង ប្រធានលេខាធិការដ្ឋានគណកម្មាធិការត្រួតពិនិត្យគ្រឿងញៀនខេត្ត បានប្រសាសន៍ថា ខេត្តព្រៃវែងមិនមែនជាទីតាំងផលិតគ្រឿងញៀនទេ ប៉ុន្តែជាខេត្តរងគ្រោះពីការលាក់លួចប្រេីប្រាស់គ្រឿងញៀន ដែលធ្វេីឲ្យប៉ះពាល់ដល់សន្តិសុខសណ្តាប់ធ្នាប់ក្នុងសហគមន៍ដូចនេះសុំអាជ្ញាធរមូលដ្ឋាន អាណាព្យាបាលត្រូវតែសហការបញ្ជូនអ្នកប្រេីប្រាស់ និងអ្នកញៀនគ្រឿងញៀនទៅទទួលសេវាព្យាបាលនៅតាមមន្ទីរពេទ្យបង្អែក មណ្ឌលសុខភាពនៅក្នុងសហគមន៍។
ក្នុងឱកាសនោះដែរ ឯកឧត្ដម ចិន សាម៉ន ទីប្រឹក្សា បានថ្លែងលេីកឡេីងដោយសាទរកោតសេីរដល់កិច្ខខិតខំប្រឹងប្រែងរបស់គណកម្មាធិការត្រួតពិនិត្យគ្រឿងញៀនខេត្តនាពេលកន្លងមក ហេីយបញ្ហាគ្រឿងញៀនអាចដោះស្រាយបានលុះត្រាតែមានការចូលរួមទាំងអស់គ្នា ធ្វេីសកម្មភាពព្រមៗគ្នាចាប់ផ្តេីមពីយេីងម្នាក់ៗដោយចាត់ទុកបញ្ហាគ្រឿងញៀនជាបញ្ហារួមរបស់យេីងទាំងអស់គ្នា ហេីយបានអំពាវនាវឲ្យប្រតិបត្តិករទេសចរណ៍បន្តចូលរួមឲ្យបានកាន់តែសកម្មបន្ថែមទៀត សហការជាមួយអាជ្ញាធរមានសមត្ថកិច្ចពាក់ពន្ធ័បង្ការទប់ស្កាត់ការរីករាលដាលបញ្ហាគ្រឿងញៀនក្នុងសហគមន៍ ដេីម្បីសុវត្ថិភាពសង្គម និងដេីម្បីអនាគតកូនចៅយេីង ៕
(ប្រភពពី ផេកអគ្គស្នងការនគរបាលជាតិ)
ដកស្រង់អត្ថបទ៖ ដារ៉ា
