Real ប្ដូរចិត្តមិនយក Pogba ដោយសារប្រាក់ឈ្នួលលើសគេលើសឯងហើយខ្លាចកីឡារ២នាក់អន់ចិត្ត
កាសែត talkSPORT បានរាយការណ៍ថា ក្រុម Real Madrid មានភាពស្ទាក់ស្ទើរក្នុងនាំយក Paul Pogba ពី Man Utd ត្បិតអីការទាមទារប្រាក់ឈ្នួលរបស់ខ្សែបម្រើរូបនេះ វាអាចធ្វើឱ្យ Gareth Bale និង Sergio Ramos ដែលទទួលបានប្រាក់ឈ្នួលខ្ពស់ដែរនោះមានការអាក់អន់ចិត្ត។
ខ្សែបម្រើរបស់បិសាចក្រហមមានទំនាក់ទំនងយ៉ាងជិតស្និទក្នុងការផ្ទេរទៅលេងនៅ Bernabeu ហើយថ្មីៗនេះសាមីខ្លួនកីឡាករក៏ធ្លាប់បានទម្លាយថាចង់ទៅលេងនៅ Real Madrid ដែរ។ គេបានដឹងថា Zinedine Zidane កំពុងមានគម្រោងរុះរើក្រុមស្ទើតែទាំងអស់ពេកដែលរដូវកាលនេះចប់ ហើយគ្រូបង្វឹកសញ្ជាតិបារាំងពេញចិត្ត Paul Pogba ខ្លាំងទៀតផង។
ប៉ុន្តែបើតាមប្រភពកាសែតអេស្ប៉ាញ AS, ក្លិបកំពុងពិចារណាអំពីប្រាក់ឈ្នួលដ៏ច្រើនរបស់ Pogba នៅ Old Trafford ខណៈរូបគេមួយសប្ដាហ៍រកបាន២៨ម៉ឺនផោនហើយតម្លៃនេះគឺ Real Madrid ពិបាករកលុយឲ្យខ្លាំងណាស់។
បើចង់បានខ្សែបម្រើរូបនេះទៅ Real Madrid ចាំបាច់ឲ្យប្រាក់ឈ្នួលខ្ពស់ជាង Man Utd ឲ្យ ហើយតម្លៃនេះធ្វើឲ្យ Paul Pogba ក្លាយជាកីឡាករមានប្រាក់ឈ្នួលខ្ពស់ជាងគេនៅក្លិប។ តែប្រសិនបើ Real ទទូចនៅតែចង់បាននោះ អាចធ្វើឲ្យកីឡាករចាស់ៗរបស់ Real Madrid ដូចជា Ramos, Bale មានការថ្នាំងថ្នាក់ចិត្តពិសេសមើលមុខគ្នាមិនចំក្នុងបន្ទប់ផ្លាស់សម្លៀកបំពាក់។
កាសែត AS ថាបច្ចុប្បន្ន Bale ទទួលបានប្រាក់ឈ្នួល២៥ម៉ឺនផោន ក្នុងមួយសប្ដាហ៍ហើយប្រធានក្រុម Sergio Ramos ទទួលបាន១៩៦០០០ផោន។ អ្វីដែលច្បាស់នោះទៀតគឺ Pogba មិនចង់ទៅ Real Madrid ជាមួយនឹងការកាត់ប្រាក់ឈ្នួលឲ្យតិចជាងអ្វីដែលរូបគេបាននៅ Man Utd នោះទេ។ អញ្ជឹងហើយ!នេះជាហេតុផលដែលធ្វើឲ្យការផ្ទេររបស់ Pogba ទៅលេងនៅ Real Madrid មិនអាចទៅរួច។
ប៉ុន្តែកីឡាករវ័យ២៦ឆ្នាំរូបនេះនឹងប្រឈមមុខជាមួយកាត់ប្រាក់ខែ២៥%ប្រសិនបើបិសាចក្រហមមិនបានលេងពានរង្វាន់ Champions League នៅរដូវកាលក្រោយទេនោះ។ អញ្ចឹងហើយ! Pogba អាចបង្ខំចិត្តទទួលយកសំណើរពី Real Madrid ជាមួយនឹងប្រាក់ឈ្នួលតិចជាងនៅក្លិបបច្ចុប្បន្នដើម្បីគេពីការកាត់ប្រាក់ឈ្នួល៕
អត្ថបទ៖ គឹមស្រ៊ិន
ប្រភព៖ talksport
