ZIdane បានបង្ហាញឈ្មោះកីឡាករចំនួន៣រូបចំៗ ជូនទៅ Perez ឲ្យត្រៀមទិញចូលរដូវកាលថ្មី

អ្នកចាត់ការទូទៅទើបត្រឡប់មកកាន់តំណែងសារជាថ្មីវិញនេះរបស់ក្លឹប Real Madrid ពោលគឺលោក Zinedine Zidane បានបង្ហាញឈ្មោះកីឡាករ៣រូបចំៗ ដាក់ស្នើរទៅកាន់លោក Florentino Perez ដែលជាម្ចាស់ក្លឹបឲ្យត្រៀមទម្លាក់លុយទិញចូល ដើម្បីត្រៀមរុះរើក្រុមសម្រាប់រដូវកាលថ្មីខាងមុខនេះ។

ច្បាស់ណាស់! ក្នុងរដូវកាលនេះអាចចាត់ទុកថាជារដូវកាលមិនល្អមួយរបស់ Real Madrid ក្នុងប៉ុន្មានឆ្នាំចុងក្រោយនេះ ខណៈការវិលត្រឡប់មកសារជាថ្មីរបស់អ្នកចាត់ការទូទៅសញ្ជាតិបារាំងរូបនេះក៏ធ្លាប់បានលើកឡើងថា រូបគាត់ព្យាយាមជួយ Real Madrid ឲ្យបញ្ចប់ចំណាត់ថ្នាក់ល្អតាមតែអាចធ្វើបានក្នុងរដូវកាលនេះ ប៉ុន្តែនឹងរុះរើក្រុមឡើងវិញនារដូវកាលបន្ទាប់។

យោងតាមបញ្ចីឈ្មោះកីឡាករ៣រូបដែល Zinedine Zidane ត្រៀមនាំចូលមកថ្មីនោះ សង្កេតឃើញថាមិនមានវត្តមានខ្សែបម្រើ Paul Pogba ឡើយ តែក្នុងនោះរួមមានខ្សែប្រយុទ្ធ Eden Hazard របស់ Chelsea, ខ្សែប្រយុទ្ធវ័យក្មេង Kylian Mbappe របស់ Paris Saint-Germain និងខ្សែបម្រើប្រយុទ្ធ Christian Eriksen របស់ក្លឹប Tottenham Hotspur ទៅវិញ។

បើតាមការរំពឹងទុក Real Madrid ត្រូវចំណាយយ៉ាងតិចណាស់ ៤០០លានអឺរ៉ូសម្រាប់ធ្វើការផ្ទេរកីឡាករ៣រូបខាងលើ ហើយអាចលើសពីចំនួនហ្នឹងទៀតប្រសិនបើត្រូវការបន្ថែមកីឡាករផ្សេងៗ ដទៃទៀតនោះ៕

អត្ថបទ៖ គឹមស្រ៊ិន