បង្រៀនបើកបរ ឬបង្រៀនបើកបុក! រថយន្តសាលាបង្រៀនបើកបរនិម្មិតមានជ័យ បើកបុកម៉ូតូ២គ្រឿង បណ្ដាលឲ្យស្លាប់ម្នាក់ និងរបួសធ្ងន់ស្រាល ២នាក់

ខេត្តបន្ទាយមានជ័យ៖ រថយន្តសាលាបង្រៀនបើកបរនិម្មិតមានជ័យ បានបើកបុកម៉ូតូ២គ្រឿង បណ្ដាលឲ្យមនុស្សស្លាប់ម្នាក់ និងរបួសធ្ងន់ស្រាល២នាក់។ ករណីគ្រោះថ្នាក់ចរាចរណ៍នេះ បានកើតឡើងនៅថ្ងៃទី២២ ខែមេសា ឆ្នាំ២០១៩ លើកំណាត់ផ្លូវជាតិលេខ៥ ត្រង់ចន្លោះបង្គោលគីឡូម៉ែត្រលេខ៣៧៩ និង៣៨០ ស្ថិតក្នុងភូមិណាកាឆាយ ឃុំកូប ស្រុកអូរជ្រៅ។ជនរងគ្រោះដែលបាត់បង់ជីវិត ឈ្មោះ សយ សុភាព អាយុ៤៤ឆ្នាំ ភេទប្រុស មុខរបរ គ្រូបង្រៀនមុខវិជ្ជាគណិតវិទ្យា នៅវិទ្យាល័យកូប ស្នាក់នៅភូមិកូបលិច ឃុំកូប ស្រុកអូរជ្រៅ ។ ឯអ្នករងរបួស២នាក់ទៀត ឈ្មោះ ឡាំ ឡាវី អាយុ៤០ឆ្នាំ ភេទប្រុស នៅភូមិគុត្តសត ឃុំគុត្តសត ស្រុកអូរជ្រៅ របួសភ្លៅខាងឆ្វេងធ្ងន់ និងប្រពន្ធ ឈ្មោះ សែន កែស អាយុ២៨ឆ្នាំ ភេទស្រី រស់នៅភូមិគុត្តសត ឃុំគុត្តសត របួសស្រាល ។

ចំណែកអ្នកបើកបររថយន្តបង្ក ឈ្មោះ តើម សុខសាន្ត ភេទប្រុស អាយុ៣៦ឆ្នាំ ជាគ្រូបង្រៀនបើកបររថយន្តសាលាបង្រៀនបើកបរនិម្មិតមានជ័យ រស់នៅភូមិក្រចាប់ សង្កាត់អូរតាវ៉ៅ ក្រុងប៉ៃលិន ខេត្តប៉ៃលិន។ មុនពេលកើតហេតុ គេឃើញរថយន្តម៉ាកកាម៉ារី ពណ៌ស ពាក់ស្លាកលេខ ភ្នំពេញ 2E 4696 បើកបរដោយឈ្មោះ តើម សុខសាន្ត ជាគ្រូបង្រៀនបើកបរ បានបើកបរពីកើតទៅលិច។ លុះមកដល់ចំណុចកើតហេតុ បានវ៉ាជែងរថយន្តមួយគ្រឿងទៀត ក្នុងស្ថានភាពគ្រោះថ្នាក់ ក៏ជ្រុលទៅបុកម៉ូតូម៉ាកវីវ៉ាមួយគ្រឿង បណ្តាលឲ្យអ្នកបើកម៉ូតូឈ្មោះ សយ សុភាព ជាគ្រូបង្រៀនមុខវិជ្ជាគណិតវិទ្យា ស្លាប់ភ្លាមៗ រួចបន្តទៅបុកម៉ូតូមួយគ្រឿងទៀត ម៉ាកវេវ សណ្តោងរ៉ឺម៉កមួយគ្រឿងទៀត បណ្ដាលឲ្យបុរសជាប្ដីរបួសបាក់ភ្លៅខាងឆ្វេង ធ្វើនិងស្រីជាប្រពន្ធ របួសស្រាល ។ ក្រោយពេលកើតហេតុ ជនរងគ្រោះត្រូវបានដឹកទៅសង្រ្គោះនៅមន្ទីរពេទ្យ ។ ចំណែកសព ត្រូវបានប្រគល់ជូនក្រុមគ្រួសារ យកទៅធ្វើបុណ្យតាមប្រពៃណី ។

អត្ថបទ Run Ji No