ចំណាត់ថ្នាក់លីគកំពូលនៅតំបន់អាស៊ី៖ ចិនជាម្ចាស់ជើងឯក, ថៃជាម្ចាស់ជើងឯកនៅអាស៊ាន ខណៈកម្ពុជាលេខ២៧

យោងទៅតាមរបាយការណ៍ពីសហព័ន្ធកីឡាបាល់ទាត់ទ្វីបអាស៊ី ដែលបានគណនាជាពិន្ទុចំពោះលីគអាជីពនៅតាមបណ្តាលប្រទេសនីមួយៗ ដែលជាសមាជិករបស់ខ្លួនក្នុងឆ្នាំ២០១៩នេះ ជាក់ស្តែងលីគកំពូលចិននៅរក្សាតំណែងកំពូលតារាង ខណៈក្នុងតំបន់អាស៊ីអាគ្នេយ៍យើង លីគថៃបន្តកាន់តំណែងលេខ១ ខណៈ ព្រុយណេ និងទីម័រខាងកើត មិនមានពិន្ទុឲ្យគណនាឡើយ។

សង្កេតមើលក្នុងតារាងចំណាត់ថ្នាក់ Top5 នៃបណ្តាលលីគកំពូលដែលមានពិន្ទុខ្ពស់ជាងគេក្នុងទ្វីបអាស៊ីរួមមាន ចិនលេខរៀងទី១ ទទួលបានពិន្ទុ ១០០% ពេញតែម្តង ចំណែកឯលេខរៀងទី២ បានទៅលើលីគកាតា ទទួលបាន ៩៨.២៧៥% , លេខ៣ លីគកូរ៉េខាងត្បូង, លេខ៤ លីគអឺរ៉ង់ និងលេខ៥ បានលើជប៉ុន ខណៈក្លឹប Kashima Antlers របស់ជប៉ុន គឺជាជើងឯកនៃព្រឹត្តិការណ៍ AFC Champions League ឆ្នាំចាស់។

ក្រឡេកមកមើលការប្រកួត​ប្រជែងនៅក្នុងតំបន់អាស៊ីអាគ្នេយ៍វិញនោះ លីគថៃនៅរក្សាតំណែងកាន់កាប់ល្អជាងគេដដែល ប៉ុន្តែវៀតណាមដែលឆ្នាំមុនទទួលបាន២កៅអីក្នុងព្រឹត្តិការណ៍ AFC Cup ដោយរួមមាន Becamex Binh Duong (ជើងឯកខាប់) និង Hanoi FC (ជើងឯកលីគ) នារដូវកាលមុន។ តែយោងទៅតាមចំណាត់ថ្នាក់ថ្មីឆ្នាំ២០១៩នេះ វៀតណាម អាចនឹងកាត់បន្ថយមកសល់ត្រឹមតែ១កៅអីវិញក្នុងព្រឹត្តិការណ៍ AFC Cup ២០២០។

ខាងក្រោមនេះជាចំណាត់ថ្នាក់សម្រាប់លីគនៅតំបន់អាស៊ីអាគ្នេយ៍ (លេខក្នុងរង្វង់ក្រចក ចំណាត់ថ្នាក់នៅប្រចាំអាស៊ី) រួមមាន៖

១.ថៃ (លេខ៨)
២.ហ្វីលីពីន (លេខ១២)
៣.សិង្ហបុរី (លេខ១៦)
៤.ម៉ាឡេស៊ី (លេខ១៧)
៥.វៀតណាម (លេខ២២)
៦.មីយ៉ាន់ម៉ា (លេខ២៥)
៧.ឥណ្ឌូនេស៊ី (លេខ២៦)
៨.កម្ពុជា (លេខ២៧)
៩.ឡាវ (លេខ៣៤)

ចំណែកឯ ព្រុយណេ និងទីម័រខាងកើត មិនទាន់មានពីន្ទុឲ្យ AFC គណនានោះឡើយ៕

អត្ថបទ៖ គឹមស្រ៊ិន