ករណីសង្ស័យជំងឺគ្រុនឈីកឡើងដល់ ១៥ខេត្តហើយ
ភ្នំពេញ ៖ រហូតមកដល់ថ្ងៃទី០៥ ខែសីហានេះ ករណីសង្ស័យជំងឺគ្រុនឈីកនៅទូទាំងប្រទេស គឺមានការកើនឡើង ១០២០ករណីសង្ស័យឡើងដល់១៧០០ ករណីសង្ស័យ ដែលកើតមានឡើងលើខេត្តចំនួន១៥ ដែលលើកមុនមានតែ១២ខេត្ត ក្រោយមកមាន៣ខេត្តទៀត គឺខេត្តកំពង់ធំ បាត់ដំបង និងខេត្តកណ្តាល ។
អ្នកនាំពាក្យក្រសួងសុខាភិបាលលោកជំទាវ ឱ វណ្ណឌីន បានបញ្ជាក់ថា សូមបងប្អូនត្រូវប្រមូលសំបកដប កំប៉ុង និងកង់ឡាន ទុកដាក់ឲ្យបានល្អ ជៀសវៀងកុំឲ្យកើតជាដង្កូវទឹក នាំឲ្យមានមូសខ្លាកកើត ត្រូវលុបបំបាត់ឲ្យបានដែលអាចដក់ទឹក ចំពោះពាងទឹក និងអាងទឹក គឺត្រូវដាក់អាបែត និងលុបបំបាត់នៅសំបកកង់ ឬក៏ចាន ឆ្នាំង ដែលដាក់ឲ្យសត្វផឹក ។
លោកជំទាវ ឱ វណ្ណឌីន បានបន្តថា បានបញ្ជាក់ថា ចៀសវៀងយ៉ាងណាកុំធ្វើឲ្យមានមូសខាំឲ្យសោះ ជាពិសេសមូសវាអាចខាំយើងនៅពេលថ្ងៃ បើមានមុងច្រលក់ថ្នាំ សូមប្រើមុងនោះ ជាជាងឲ្យមូសខាំ ។ ចំពោះការដើរកម្សាន្តខាងមុខ សូមកុំភ្លេចពេលធ្វើដំណើរទៅណាមកណា ក៏អាចមានមូសខាំ ត្រូវប្រយ័ត្ន និងការពារគ្រប់ពេល ។
ខេត្តដែលមានករណីសង្ស័យជំងឺឈីក រួមមានខេត្តសៀមរាប បន្ទាយមានជ័យ ព្រះវិហារ និងកំពង់ចាម ខេត្តឧត្តរមានជ័យ ត្បូងឃ្មុំ តាកែវ កំពត ព្រះសីហនុ ពោធិ៍សាត់ ស្ទឹងត្រែង ប៉ៃលិន កំពង់ធំ បាត់ដំបង និងខេត្តកណ្តាល៕
