រដ្ឋមន្ត្រីក្រសួងវប្បធម៌ អញ្ជើញប្រទានភ្លើងបូជាសពលោកព្រឹទ្ធាចារ្យ ព្រីង សាឃន

(ភ្នំពេញ)៖ លោកជំទាវ ភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈ តំណាងដ៏ខ្ពង់ខ្ពស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា បានអញ្ជើញប្រទានភ្លើងបូជាសពលោកព្រឹទ្ធាចារ្យ ព្រីង សាឃន មរតកមនុស្សរស់នៃព្រះរាជាណាចក្រកម្ពុជា ដែលបានទទួលមរណភាព កាលពី ថ្ងៃទី១៩ ខែកក្កដា ឆ្នាំ២០២០ វេលា ម៉ោង៥:៤៥នាទីល្ងាច ក្នុងជន្មាយុ៨៣ឆ្នាំ ដោយជរាពាធ។

ពិធីប្រទានភ្លើងបូជាសព បានប្រព្រឹត្តទៅនៅព្រឹកថ្ងៃទី២២ ខែកក្កដា ឆ្នាំ២០២០នេះ នៅវត្តឬស្សីស្រស់ ខណ្ឌច្បារអំពៅ ក្រោមបរិយាកាស និងទឹកចិត្តដ៏សែនក្តុកក្តួល ក្រៀមក្រំ សោកស្តាយ និងអាឡោះអាល័យរកអ្វីប្រៀបផ្ទឹមពុំបាន។

កម្មវិធីនេះមានការចូលរួមពីសំណាក់ គ្រួសារនៃសព ព្រះថេរានុថេរៈគ្រប់ព្រះអង្គ ថ្នាក់ដឹកនាំ មន្រ្តីរាជការ លោកសាស្រ្តាចារ្យ លោកគ្រូ អ្នកគ្រូ ព្រមទាំងសិស្សានុសិស្ស យ៉ាងច្រើនកុះករ ។

ជាមួយនឹងក្តីសោកស្តាយ អាឡោះអាល័យ និងការយកចិត្តទុកដាក់ចំពោះសិល្បករ សិល្បការិនីតាមរយៈ លោកជំទាវ រដ្ឋមន្ត្រីក្រសួង វប្បធម៌និងវិចិត្រសិល្ប: សម្តេចអគ្គមហាសេនាបតី តេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជាក៏បានផ្ញើសារ គោរពជូនដំណើរលោកព្រឹទ្ធាចារ្យជាលើកចុងក្រោយព្រមទាំងបានឧទ្ទិសសូមឱ្យដួងវិញ្ញាណក្ខន្ធ ព្រឹទ្ធាចារ្យនាដកោសល្យវដ្តី ព្រីង សាឃន បានសោយសុខក្នុងសុគតិភពផងដែរ ៕