លោក SOLSKJAER បន្ទោសកីឡាកររបស់ខ្លួនជាសាធារណៈដោយសារលទ្ធផលនៅ PL និង UCL
ក្លឹប Manchester United កំពុងឋិតក្នុងស្ថានភាពមួយលំបាក។ ក្រោយពេលដែលក្លឹបនេះបានបង្ហាញឆន្ទៈសម្រុកចូលទៅក្នុងចំណោម ៤ក្រុមនៅកំពូលតារាង ពួកគេបែរជាជួបនឹងជោគវាសនាមិនសូវល្អទៅវិញ។បរាជ័យក្រោមស្នាដៃក្លឹបមួយចំនួនដូចជា Wolves, Arsenal និង Barcelona បានធ្វើឲ្យអ្នកចាត់ការ Ole Gunnar Solskjaer ជួបនឹងបញ្ហាដែលត្រូវដោះស្រាយជាបន្ទាន់។
កីឡាកររបស់គាត់មិនបានឆ្លើយតបតាមការទាមទាររបស់គាត់នោះទេ ហើយគាត់ក៏មិនក្រែងញញើតដែរក្នុងការនិយាយឲ្យពួកគេដឹងនៅក្នុងសន្និសីទកាសែតមួយដែលធ្វើឡើងក្រោយពីក្រុមបិសាចក្រហមត្រូវធ្លាក់ចេញពីការប្រកួតឆេមពានស៍លីគដោយចាញ់ក្លឹប Barcelona។
អ្នកចាត់ការរូបនេះបានលើកឡើងថា៖ “កីឡាករមួយចំនួនធំបានធ្វើឲ្យខ្ញុំពេញចិត្តចំពោះអត្តចរិតរបស់ពួកគេ”។
“ប៉ុន្តែក៏មានកីឡាករមួយចំនួនផ្សេងទៀតដែលត្រូវធ្វើការស្វ័យពិចារណាចំពោះស្ថានភាពបច្ចុប្បន្នរបស់គេដែរ”។
“ខ្ញុំបានជជែកជាមួយពួកគេដោយផ្ទាល់ ដែលក្នុងនោះក៏មាន Anthony Martial ផងដែរ ហើយពួកគេដឹងថាក្លឹបចង់បានអ្វីខ្លះពីពួកគេ”
“កីឡាករគ្រប់រូបដែលលេងឲ្យក្លឹប Manchester United ត្រូវសម្រេចលទ្ធផលដើម្បីអាចបន្តលេងក្នុងក្រុមនេះបាន ហើយ Anthony ក៏មិនខុសពីកីឡាករខ្សែប្រយុទ្ធផ្សេងៗទៀតដូចជា Marcus Rashford, Romelu Lukaku និង Alexis Sanchez ដែរ គឺយើងអាចជ្រើសរើសយកអ្នកណាមកលេងក៏បាន”។
អត្ថបទ៖ គឹមស្រ៊ិន
