សារព័ត៌មានបារាំងដាក់រូបគំនូរថើបគ្នារវាង RONALDO និង MESSI លើក្របមុខ
ការប្រជែងប្រជាប្រិយភាពរវាងកីឡាករ Lionel Messi និង Cristiano Ronaldo ជាការប្រកួតប្រជែងមួយដែលទាក់ទាញការចាប់អារម្មណ៍ខ្លាំងនៅក្នុងប្រវត្តិសាស្ត្របាល់ទាត់។
កីឡាករទាំងពីររូបត្រូវបានចាត់ចូលក្នុងចំណោមកីឡាករដែលឆ្នើមបំផុតក្នុងលោក ហើយជានិច្ចកាល ពួកគេត្រូវបានគេយកមកប្រៀបធៀបគ្នាជារឿយៗ។
កំពូលខ្សែប្រយុទ្ធទាំងពីររូបកំពុងឋិតលើដំណើរផ្លូវឆ្ពោះទៅរកតំណែងជើងឯកក្នុងលីគកំពូលនៅក្លឹបរបស់គេរៀងៗខ្លួន ដោយ Messi កំពុងសម្ដៅទៅរកពានលីគកំពូលអេស្ប៉ាញជាមួយ Barcelona រីឯ Ronaldo នៅក្នុងពានលីគកំពូលអ៊ីតាលីជាមួយ Juventus។ ពួកគេទាំងពីរក៏កំពុងតែរក្សាទម្រង់លេងល្អរៀងៗខ្លួនដែរ ដោយ Messi រកបានគ្រាប់បាល់ ៣៣គ្រាប់ក្នុងរដូវកាលនេះ ខណៈដែល Ronaldo រកបាន ១៩គ្រាប់។
ប៉ុន្តែថ្មីៗនេះ ការប្រជែងរវាងកីឡាករទាំងពីរនៅក្នុងសារព័ត៌មានហាក់ដូចជាបែរឆ្ពោះទៅរកទិសដៅមួយផ្សេងទៀត ដោយសារព័ត៌មានមួយរបស់បារាំងដែលមានឈ្មោះថា France Football បានបោះផ្សាយផ្ទាំងរូបគំនូរមួយផ្ទាំងដែលមានរូបកីឡាករទាំងពីរកំពុងតែថើបគ្នាទៅវិញ ដូចដែលប្រិយមិត្តបានឃើញនៅក្នុងរូបខាងក្រោមនេះ៖
