លោក ឱក បូនី និយាយថា គ្មានចេតនាបង្ខូចកិត្តិយសកូនទេគ្រាន់តែមិនចង់ឲ្យកូនសាងបាបកាន់តែជ្រៅ
ភ្នំពេញ៖លោក ឱក បូនី ដែលត្រូវជាឪពុកបង្កើតរបស់កំពូលតារាចម្រៀងអ្នកនាង ឱក សុគន្ធកញ្ញា ពេលនេះបានបញ្ចេញសារថ្មីមួយទៀតបន្ទាប់កាលពីថ្ងៃទី២២ខែមិថុនាឆ្នាំ២០២០កន្លងទៅលោកបានបង្ហាញសារខ្លីមួយធ្វើឱ្យមានចាប់អារម្មណ៍និងភ្ញាក់ផ្អើលខ្លាំងទាក់ទងរឿងរ៉ាវរវាងលោកនិងកូនស្រី ឱក សុគន្ធកញ្ញា។
តាមរយៈខ្លឹមសាររបស់លោក ឱក បូនីកាលពីថ្មីៗកន្លងទៅនេះបានក្លាយជាប្រធានបទក្តៅ និងជាព័ត៌មានដ៏រសើបមួយ ចំពោះមហាជនរួមទាំងអ្នកគាំទ្រគ្រប់មជ្ឈដ្ឋានទូទៅ។ម្យ៉ាងទៀតក៏មានបណ្តាញសាព័ត៌មានក្នុងស្រុកមួយចំនួនធំបានសម្រង់សម្តីរបស់លោក ឱក បូនី ដែលថា ឱក សុគន្ធកញ្ញា ជាកូនមិនស្គាល់ឪពុក យកទៅសរសេរចុះផ្សាយយ៉ាងព្រោងព្រាតទៀតផង។
ជាមួយគ្នានឹងដំណឹងនេះដែរជាកត់សម្គាល់ឃើញថា តារាចម្រៀងអ្នកនាងឱក សុគន្ធកញ្ញាហាក់គ្មានការបញ្ចេញប្រតិកម្ម ឬចេញមុខបកស្រាយអ្វីឡើយជុំវិញព័ត៌មានមួយនេះ ខណៈមានមហាជននិងអ្នកគាំទ្រមួយចំនួននៅតែអន្ទះសារចង់ដឹងរឿងហេតុពិតចេញពីមាត់អ្នកនាង ឱក សុគន្ធកញ្ញា ចំពោះបញ្ហារវាងនាងនិងឪពុក។
ថ្វីត្បិតតែតារាស្រីអ្នកនាង ឱក សុគន្ធកញ្ញាមិនបានចេញមុខតបតជាមួយលោក ឱក បូនី ដែលជាឪពុកក៏ពិតមែនប៉ុន្តែមុននេះក៏ស្រាប់តែលោក ឱក បូនី បានព្រលយសារខ្លីមួយទៀតដែលនិយាយថា លោកមិនចង់ឲ្យកូនសាងបាបកាន់តែជ្រៅជាងនេះទៀតទេ។ យោងតាមខ្លឹមសាររបស់លោក ឱក បូនី បានលើកឡើងថាទឹកចិត្តឪពុកមិនចង់បង្ខូចកិត្តិយសកូនទេនិងមិនចង់បានអ្វីពីកូនទេតែមិនចង់ឱ្យកូនសាងបាបកាន់តែជ្រៅ។
ជាថ្មីម្តងទៀតអ្នកនាង ឱក សុគន្ធកញ្ញា នៅរសៀលថ្ងៃទី២៧ខែមិថុនាឆ្នាំ២០២០អង្គភាពសាព័ត៌មានកម្ពុជាថ្មីមិនអាចស្វែងរកការបកស្រាយបាននៅឡើយទេជុំវិញរឿងហេតុដែលកំពុងតែកើតមានឡើងចំពោះនាងនារយៈពេលប៉ុន្មានថ្ងៃជាប់ៗគ្នានេះ។
សង្ឃឹមថា អ្នកនាង ឱក សុគន្ធកញ្ញា នឹងអាចចេញមុខស្រាយបំភ្លឺចម្ងល់នេះឲ្យមហាជនបានដឹងច្បាស់៕
