ក្រុមបាល់ទាត់ជម្រើសជាតិកម្ពុជា បានលេខ២ស្ថិតនៅតំបន់ជាមួយប៉ាគីស្ថានឆ្នាំ១៩៦៧ជម្រុះAFC Asian Cup

ចេញផ្សាយ ថ្ងៃទី19 ខែមេសា ឆ្នាំ2019

ក្រុមបាល់ទាត់ជម្រើសជាតិកម្ពុជា និងជម្រើសជាតិប៉ាគីស្ថាននឹងប៉ះគ្នាគ្នានាខែមិថុនាខាងមុខនេះក្នុងព្រឹត្តិការណ៍ជម្រុះជើងឯកពិភពលោក FIFA World Cup 2022 និង 2023 AFC Asian Cup ជុំទី១ប្រចាំតំបន់អាស៊ីដើម្បីស្វែងរកក្រុមឡើងទៅវគ្គជម្រុះជុំទី២។

បើក្រឡេកមើលប្រវត្តិក្រុមទាំងពីរឃើញថា កម្របានជួបគ្នាណាស់ក្នុងការប្រកួតផ្លូវការ។ ក្រុមទាំងពីរធ្លាប់ជួបគ្នា១ដងក្នុងការប្រកួតជម្រុះពានរង្វាន់ AFC Asian Cup Qualification 1967។ ការប្រកួតវគ្គជម្រុះនេះធ្វើឡើងនៅប្រទេសមីយ៉ាន់ម៉ាដែលធ្វើម្ចាស់ផ្ទះសម្រាប់តំបន់ Western Zone 2 ដែលមានប្រទេសមីយ៉ាន់ម៉ា (ភូមា) កម្ពុជា ប៉ាគីស្ថាន និងឥណ្ឌា។

ឆ្លងកាត់៣ប្រកួតប្រចាំតំបន់នេះ ក្រុមជម្រើសជាតិកម្ពុជារកបាន៤ពិន្ទុពីការប្រកួតឈ្នះ២ និងចាញ់១។ ថ្ងៃទី១៣ ខែវិច្ឆិកា ឆ្នាំ១៩៦៧ កម្ពុជាបានយកឈ្នះប៉ាគីស្ថានដោយលទ្ធផល ១-០ ប៉ុន្តែ៣ថ្ងៃក្រោយមកកម្ពុជាបានចាញ់ម្ចាស់ផ្ទះភូមា ១-០ ខណៈការប្រកួតបញ្ចប់ថ្ងៃទី១៨ ខែវិច្ឆិកា ឆ្នាំ១៩៦៧ កម្ពុជាបានយកឈ្នះឥណ្ឌាដោយលទ្ធផល ៣-១។

តារាងពិន្ទុប្រចាំតំបន់ Western Zone 2

សូមបញ្ជាក់ថា ការប្រកួតពេលនោះ ឈ្នះមួយប្រកួតទទួលបាន២ពិន្ទុ ស្មើទទួលបាន១ពិន្ទុ ដូច្នេះកម្ពុជាបញ្ចប់វគ្គជម្រុះដោយស្ថិតនៅចំណាត់ថ្នាក់លេខ២ដោយមាន៤ពិន្ទុ ខណៈម្ចាស់ផ្ទះភូមាបាន៦ពិន្ទុពេញពីការឈ្នះទាំង៣ប្រកួតស្ថិតនៅលេខ១បានឡើងទៅជុំផ្តាច់ព្រ័ត្រដែលបានក្លាយជាជើងឯករង AFC Asian Cup 1968 ហើយប៉ាគីស្ថាន និងឥណ្ឌាបាន១ពិន្ទុដូចគ្នា។

ពេលនោះកាសែត The Straits Times ចេញផ្សាយថ្ងៃទី២០ ខែវិច្ឆិកា ឆ្នាំ១៩៦៧ដែលដាក់ចំណងជើងថា កម្ពុជាបង្ហាញភាពខ្លាំងយកឈ្នះឥណ្ឌា។ ៣គ្រាប់ដែលកម្ពុជាយកឈ្នះឥណ្ឌាដោយលទ្ធផល ៣-១ គឺកីឡាករ ស៊ី ចេងអៀង តែតចូលទីបានសម្រេចគ្រាប់ទី១នៅនាទីទី៣៥ដែលជាការបញ្ជូនបាល់ដ៏ល្អរបស់វីរបុរសកម្ពុជា ប៉ែន ផាត។

ចូលវគ្គទី២ កីឡាករកម្ពុជា សៀង ធារ៉ា ស៊ុតបាន២គ្រាប់ដើម្បីនាំមុខ ៣-០ ដោយនៅនាទី៥៧រកបាន១គ្រាប់ និងនាទី៦០បាន១គ្រាប់ទៀត។ យ៉ាងណានៅចុងម៉ោង ឥណ្ឌារកបាន១គ្រាប់ដោយកីឡាករ Kannan។

សូមបញ្ជាក់ថា កម្ពុជា និងប៉ាគីស្ថាននឹងជួបគ្នាជើងទី១ នឹងធ្វើនៅថ្ងៃទី៦ ខែមិថុនា ឆ្នាំ២០១៩ ពហុកីឡដ្ឋានជាតិ ក្នុងរាជធានីភ្នំពេញ និងជើងទី២ ថ្ងៃទី១១ ខែមិថុនា ឆ្នាំ២០១៩ នៅទឹកដីប៉ាគីស្ថាន ក្នុងយុទ្ធនាការណ៍ជម្រុះជើងឯកពិភពលោក FIFA World Cup 2022 និង 2023 AFC Asian Cup ជុំទី១ប្រចាំតំបន់អាស៊ី៕

ក្រុម​បាល់ទាត់​ជម្រើស​ជាតិ​កម្ពុជា​ បានលេខ២ស្ថិតនៅតំបន់ជាមួយប៉ាគីស្ថានឆ្នាំ១៩៦៧ជម្រុះAFC Asian Cup​

ក្រុមបាល់ទាត់ជម្រើសជាតិកម្ពុជា បានលេខ២ស្ថិតនៅតំបន់ជាមួយប៉ាគីស្ថានឆ្នាំ១៩៦៧ជម្រុះAFC Asian Cup