ទឹកដីក្រុងរណបជ្រោយចង្វារ មានមជ្ឈមណ្ឌលកម្សាន្ដថ្មីមួយទៀតហើយ
(ភ្នំពេញ)៖ មជ្ឈមណ្ឌលកំសាន្ត Phnom Penh Fantasy World ដែលត្រូវបានគេដឹងជារបស់ថៅកែជនជាតិចិនមួយរូប បានបើកសាកល្បងល្បងឲ្យភ្ញៀវចូលទស្សនាកាលពីពេលថ្មីៗនេះ នៅលើទឹកដីនៃក្រុងរណបជ្រោយចង្វារ ជាប់នឹងសួនសត្វដាយណូស័រ របស់មហាសេដ្ឋីជួរមុខរបស់កម្ពុជា អ្នកឧកញ៉ា ពុង ឃាវសែ។ អ្នកគ្រប់គ្រងនៃក្រុមហ៊ុន OCIC បានឲ្យដឹងថា មជ្ឈមណ្ឌលកម្សាន្ដ Phnom Penh Fantasy World បានជួលដីទំហំជាងមួយហិកតា ក្នុងចំណោមផ្ទៃដីសរុបជាង ៥ហិកតាពីសួនដាយណូស័រ របស់ ក្រុមហ៊ុន OCIC ដោយបានកំណត់កុងត្រាក្នុងរយៈពេលវែងមួយតែមជ្ឈមណ្ឌលកម្សាន្ដ Phnom Penh Fantasy World នេះមិនមែនជារបស់ក្រុមហ៊ុន OCIC ទេ។ មជ្ឈមណ្ឌលកម្សាន្ដ Phnom Penh Fantasy គឺ បានបើកដំណើរការសាកល្បងនៅថ្ងៃទី២២ ខែឧសភា ចំពេលដែលវិធានការរឹតបន្ដឹងការជួបជុំនៅបន្ដ នៅឡើយ ។
អ្នកគ្រប់គ្រងនៅក្រុមហ៊ុន OCIC បានអះអាងទៀតថា ចំពោះការបើកសាកល្បងរបស់មជ្ឈមណ្ឌល កំសាន្ត Phnom Penh Fantasy World នាពេលថ្មីៗនេះគឺជាការសម្រេច របស់ថៅកែរបស់ មជ្ឈមណ្ឌល កម្សាន្ដនេះមិនមានពាក់ព័ន្ធសួនដាយណូស័រ ដែលបានជួលដីឲ្យនោះទេ។ ទោះយ៉ាងណា លោកថា ការ សាកល្បង របស់ Phnom Penh Fantasy World នេះគ្រាន់តែចង់បានមតិយោបល់ពីសាធារណជន ដើម្បី កែលម្អចំណុចខ្វះខាតរបស់ខ្លួនតែប៉ុណ្ណោះ ។
អ្នកគ្រប់គ្រងផ្នែករដ្ឋបាល នៃមជ្ឈមណ្ឌលកម្សាន្ដ Phnom Penh Fantasy World បានប្រាប់ខេមបូណីមី សថា បន្ទាប់ពីបើកសាកល្បងរយៈពេលប៉ុន្មានថ្ងៃមានសាធារណជន ចូលទស្សនាខ្ទង់ពាន់នាក់ ដែល ធ្វើឲ្យកញ្ញាយល់ថា ការបើក ជាផ្លូវការរបស់ Phnom Penh Fantasy World នាពេលខាងមុខ នឹង ជោគជ័យជាក់ជាមិនខាន។ ចំពោះទំហំទឹកប្រាក់នៃការវិនិយោគមជ្ឈមណ្ឌលកម្សាន្ដនេះ កញ្ញាអះអាង ថាមិនអាចប្រាប់បានទេ គ្រាន់តែដឹងថាការវិនិយោគខ្ទង់លានដុល្លារ ហើយថៅកែគឺជាជនជាតិចិន ដែលមានបទពិសោធន៍លើជំនួញប្រភេទនេះ នៅឯប្រទេសចិនរួចមកហើយ ទើបមកបើកសាខា បន្ថែមនៅកម្ពុជានេះ។ ការបើកសាកល្បងនេះ គឺទទួលបានការ អនុញ្ញាតពីអាជ្ញាធរ និងខាងសុខាភិបាល រួចរាល់ហើយ ដោយសន្យាថា នឹងអនុវត្តឲ្យបានខ្ជាប់ខ្ជួនបំផុត រាល់វិធានការដែលបានដាក់ចេញ ដោយ រាជរដ្ឋាភិបាល និងក្រសួងសុខាភិបាល ។
សូមបញ្ជាក់ថា តំបន់អភិវឌ្ឍន៍ទីក្រុងរណបជ្រោយចង្វារ របស់មហាសេដ្ឋីអ្នកឧកញ៉ា ពុង ឃាវសែ បាន គ្របដណ្តប់ លើផ្ទៃដីប្រមាណជាង ២០០ ហិកតា ដែលហ៊ុម ព័ទ្ធទៅដោយលំនៅដ្ឋានប្រណីត អាគារ ពាណិជ្ជកម្មទំនើបៗ ការប្រមូលផ្តុំឃ្លាំងរថយន្តទំនើបធំៗ ដែលអមដោយទីក្រុងម្ហូបអាហារ និងតំបន់ កម្សាន្ដច្រើនជាងគេនៅរាជធានីភ្នំពេញនៅក្បែរនោះផងដែរ ៕
