លោក គីម ជុងអ៊ុន បានបង្ហាញមុខជាសាធារណៈវិញលើកដំបូង ក្រោយលាក់ខ្លួន ២០ថ្ងៃ

(កូរ៉េខាងជើង)៖ប្រព័ន្ធផ្សព្វផ្សាយរដ្ឋរបស់កូរ៉េខាងជើងបានរាយការណ៍នៅព្រឹកថ្ងៃសៅរ៍ ទី២ ខែមេសានេះ ថាលោកគីម ជុងអ៊ុន បានបង្ហាញខ្លួននៅក្នុងពិធីអបអរសាទរទិវាពលកម្ម១ឧសភា ដែលត្រូវបានចាត់ទុកជាការបង្ហាញខ្លួនជាសាធារណៈលើកដំបូងរបស់លោកក្នុងរយៈពេលប្រហែលបីសប្តាហ៍កន្លងមកនេះ។

ទីភ្នាក់ងារសារព័ត៌មានកណ្តាលកូរ៉េ KCNA បានរាយការណ៍ថា “មេដឹកនាំកំពូលគីមជុងអ៊ុនបានកាត់ខ្សែបូរសម្រាប់សម្ពោធរោងចក្រជី Sunchon Phosphatic” ដោយលោកត្រូវបានអមដំណើរដោយមន្ត្រីជាន់ខ្ពស់កូរ៉េខាងជើងជាច្រើននាក់រួមទាំងប្អូនស្រីរបស់លោក អ្នកនាង គីម យ៉ូជុង ផងដែរ។

យ៉ាងណាមិញ មូលហេតុនៃ​ការ​បាត់មុខ​របស់​លោក​ជាង ២០ថ្ងៃ និង​ស្ថានភាពសុខភាពរបស់​លោកគឺមិនត្រូវបាន​រាយការណ៍​នោះ​ទេ។

គួររំឭកថា សំណួរជាច្រើនត្រូវបានគេលើកឡើងអំពីសុខភាពរបស់លោកគីមបន្ទាប់ពីលោកបានអវត្តមានក្នុងប្រារព្ធពិធីខួបអនុស្សាវរីយ៍ជីតារបស់លោកកាលពីថ្ងៃទី ១៥ ខែមេសា។ លោកមិនបានបង្ហាញខ្លួនជាសាធារណៈទេចាប់តាំងពីបានធ្វើជាអធិបតីក្នុងកិច្ចប្រជុំនយោបាយគណបក្សពលករកាលពីថ្ងៃទី ១១ ខែមេសា បើយោងតាមប្រព័ន្ធផ្សព្វផ្សាយរដ្ឋកូរ៉េខាងជើង KCNA ។

នៅពេលត្រូវបានសួរអំពីការលេចមុខជាថ្មីរបស់លោកគីមក្រោយមានសេចក្ដីរាយការណ៍ចុងក្រោយនេះ ប្រធានាធិបតីសហរដ្ឋអាមេរិក លោកដូណាល់ ត្រាំ បានប្រាប់អ្នកសារព័ត៌មានថាលោកមិនទាន់ចង់ធ្វើអត្ថាធិប្បាយអំពីបញ្ហានេះនៅឡើយទេ ៕