ឡានទឹកកកបុកនឹងហាយឡែនឌ័រ ស្លាប់មនុស្ស០២នាក់ និងរងរបួសធ្ងន់ និងស្រាល ០៥នាក់

ភ្នំពេញ ៖ កាលពីព្រឹក ថ្ងៃទី១០ ខែមេសា ឆ្នាំ២០១៩ វេលាម៉ោងប្រមាណជា ០៥:៣០នាទី ស្ថិតនៅតាមបណ្តោយផ្លូវជាតិលេខ០៤ ស្ថិតក្នុងភូមិផ្សារត្រពាំងក្រឡឹង ឃុំគីរីវន្ត ស្រុកភ្នំស្រួច ខេត្តកំពង់ស្ពឺ មានករណីគ្រោះថ្នាក់ចរាចរណ៍ដ៏រន្ធត់រវាងរថយន្តហាយឡែនឌ័រ បុកជាមួយនឹង រថយន្តដឹកទឹកកក ដែលបណ្ដាលឲ្យមនុស្សចំនួន ០២នាក់ បានគៀបស្លាប់នៅក្នុងរថយន្ត និង ០៥នាក់ផ្សេងទៀត បានរងរបួសធ្ងន់ និងស្រាល ។

នៅក្នុងហេតុការណ៍នេះ កម្លាំងសមត្ថកិច្ចមូលដ្ឋាន បានចុះមកកន្លែងកើតហេតុ ជួយធ្វើការអន្តរាគមន៍ និងសម្រួលចរាចរណ៍ ព្រមទាំង យកជនរងគ្រោះទៅកាន់មន្ទីរពេទ្យ រីឯសពដែលគៀបជាប់ក្នុងរថយន្ត ត្រូវបានសហការជាមួយពលរដ្ឋ យកសពចេញពីក្នុងរថយន្តភ្លាមៗផងដែរ។រីឯរថយន្តបង្កហេតុទាំងពីរ ត្រូវបានកម្លាំងអធិការស្រុកភ្នំស្រួច ស្ទួចយករថយន្តទៅរក្សាទុក ដើម្បីដោះស្រាយនៅពេលក្រោយ ៕

អត្ថបទ៖ សីហា