អាជ្ញាធរថៃបញ្ជូនពលករខ្មែរ៣នាក់ ទៅតុលាការ ដោយសារមិនព្រមបង់ពិន័យ ករណីផឹកស៊ីបំពានបម្រាម
(ភ្នំពេញ)៖ អ្នកនាំពាក្យក្រសួងការបរទេស និងសហប្រតិបត្តិការអន្តរជាតិកម្ពុជា លោក កុយ គួង បានអះអាងថា តាមព័ត៌មានដែលលោកទទួលបាន ពលករខ្មែរចំនួន៣នាក់ ដែលអាជ្ញាធរថៃឃាត់ខ្លួន ក្នុងពេលផឹកស៊ីបំពានបម្រាមដាក់ប្រទេស ក្នុងគ្រាអាសន្ននោះ ត្រូវបានបញ្ជូនទៅតុលាការ ដោយសារពួកគេមិនបានបង់លុយពិន័យ។
លោក កុយ គួង ថ្លែងឲ្យដឹងបែបនេះ ក្រោយជំនួបរវាងឯកឧត្ដមឧបនាយករដ្ឋមន្ត្រី ប្រាក់ សុខុន រដ្ឋមន្ត្រីការបរទេស និងសហប្រតិបត្តិការអន្តរជាតិកម្ពុជា ជាមួយលោក អ៊ឺមែនែហ្ស៊ីលដូ គូប៉ា ឡូប៉េស (Ermenegildo Kupa Lopes) ឯកអគ្គរដ្ឋទូតតែងតាំងថ្មីនៃសាធារណរដ្ឋ ប្រជាធិបតេយ្យទីម័រឡេស្តេ ប្រចាំព្រះរាជាណាចក្រកម្ពុជា ដែលលោកបានចូលជួបសម្តែងការគួរសម កាលពីថ្ងៃទី២៩ ខែមេសា ឆ្នាំ២០២០។
លោក កុយ គួង បានបញ្ជាក់ថា ខណៈដែលអាជ្ញាធរថៃបានហាមប្រាមមិនឲ្យមានការជួបជុំគ្នា តាមច្បាប់ដាក់ប្រទេសក្នុងគ្រាអាសន្ននោះ មានប្រជាពលរដ្ឋខ្មែរចំនួន១៧នាក់ ត្រូវបានអាជ្ញាធរថៃឃាត់ខ្លួន ដោយសារតែជួបជុំគ្នាផឹកស៊ី ហើយបើតាមច្បាប់ថៃ នៅពេលដែលបំពានច្បាប់របស់គេ ត្រូវតែទទួលនូវការពិន័យ ហើយការពិន័យនោះ គឺមានចំនួន ៤០ ០០០ បាត (បួនម៉ឺនបាត) ក្នុងម្នាក់។ លោកបញ្ជាក់ថា ក្នុងចំណោម១៧នាក់នោះ មានចំនួន១៤នាក់ បានបង់ប្រាក់ពិន័យរួចហើយ និងបានដោះលែងចេញមកវិញផងដែរ។ ចំណែក៣នាក់ទៀត មិនព្រមបង់ប្រាក់ ដូច្នេះអាជ្ញាធរថៃ បានរៀបចំនីតិវិធីបញ្ជូនទៅតុលាការ ហើយស្ថានទូតកម្ពុជាបានតាមដានរឿងនេះជាប់រហូត។
បើតាមលោក កុយ គួង នៅប្រទេសថៃ មានកម្មករប្រមាណពីរបីនាក់ប៉ុណ្ណោះ ដែលបានឆ្លងជំងឺកូវីដ-១៩ ប៉ុន្តែពួកគេបានជាសះស្បើយអស់ហើយ តែមកដល់ពេលនេះ លោកមិនដឹងថា មានប្រជាពលរដ្ឋប៉ុន្មាននាក់ ដែលចង់ធ្វើដំណើរមកកម្ពុជានោះទេ ដោយសារតែប្រទេសថៃនៅពេលនេះ កំពុងតែដាក់ឲ្យស្ថិតនៅក្នុងភាពអាសន្ន ដែលបានហាមប្រជាពលរដ្ឋមិនឲ្យធ្វើដំណើរពីតំបន់មួយទៅតំបន់មួយ ពីខេត្តមួយទៅខេត្តមួយ។
គួររំលឹកថា កាលពីថ្ងៃទី១២ ខែមេសា រដ្ឋាភិបាលថៃបានដាក់បម្រាមលើការលក់គ្រឿងស្រវឹង ឬសេពគ្រឿងស្រវឹង ព្រមទាំងបញ្ជាឱ្យបិទហាង ឬដេប៉ូលក់ស្រា និងស្រាបៀរនៅទូទាំងប្រទេសក្នុងអំឡុងរដូវបុណ្យចូលឆ្នាំថ្មី ដើម្បីបញ្ចៀសការជួបជុំ និងប្រមូលផ្តុំគ្នាផឹកគ្រឿងស្រវឹង ដែលនាំឲ្យមានការរីករាលដាល នៃកូវីដ-១៩។ តែក្រោយថ្ងៃដាក់បម្រាមនេះ សមត្ថកិច្ចថៃ ខេត្តផាធុមថានី បានឃាត់ខ្លួនពលករខ្មែរប្រុសស្រីចំនួន១៧នាក់ នៅល្ងាចថ្ងៃទី១៤ ខែមេសា ដោយសារពួកគេប្រមូលផ្តុំគ្នាផឹកគ្រឿងស្រវឹងនៅមុខបន្ទប់ជួលរបស់ខ្លួន សមត្ថកិច្ចថៃបញ្ជាក់ ថា ការឃាត់ខ្លួនពលរដ្ឋខ្មែរនេះ ដោយសារពួកគេបានបំពានបម្រាមរបស់រដ្ឋាភិបាលថៃ ដែលហាមមិនឲ្យមានការជួបជុំសេពគ្រឿងស្រវឹង នៅអំឡុងពេលចូលឆ្នាំថ្មី ដើម្បីទប់ស្កាត់ការរីករាលដាលនៃជំងឺកូវីដ-១៩។
ពាក់ព័ន្ធបញ្ហានេះ កាលពីពេលកន្លងទៅ សម្ដេចតេជោ ហ៊ុន សែន បានអំពាវនាវដល់ពលករ ខ្មែរ ដែលកំពុងរស់នៅធ្វើការក្រៅប្រទេស ជាពិសេសនៅប្រទេសថៃ ត្រូវគោរពតាមច្បាប់ និងបទបញ្ញត្តិទាំងឡាយ ដែលប្រទេសគេបានដាក់ចេញ រួមទាំងច្បាប់បម្រាមគោចរ និងបម្រាមជួបជុំគ្នាជាក្រុម ឬជប់លៀងជាក្រុម ដែលពេលនេះ ប្រទេសគេកំពុងមានការហាមឃាត់ តឹងរឹងបំផុតក្នុងការទប់ស្កាត់ ការចម្លងរោគកូវីដ-១៩៕
