គ្រាន់តែកូវីដ១៩ នាយ ចឺម បាត់បង់ចំណូលប្រមាណជាង៦ម៉ឺនដុល្លារ
(ភ្នំពេញ)៖ ស្ទើរតែមិនគួឲ្យជឿ សម្រាប់តារាចម្រៀងក្រមិចក្រមើម សុខ មេសា ហៅនាយចឺម ត្រូវបានប្រភពពីអ្នកសិល្បៈដូចគ្នា ទម្លាយឲ្យដឹងថា គ្រាន់តែនៅក្នុងអំពេលខែមេសា ឆ្នាំ២០២០នេះ នាយ ចឺម បានបាត់បង់ចំណូល តាមរយៈការប្រគំតន្ត្រីអស់ពីខ្លួនតែម្ដង ព្រោះតែជំងឺកូវីដ១៩ ដែលគិតជាទឹកប្រាក់សរុបប្រមាណជាង៦ម៉ឺនដុល្លារ។
យោងតាមប្រភពព័ត៌មានពីអ្នកសិ្នទ្ធនឹង នាយ ចឺម បានបន្តខ្សឹបប្រាប់ថា បើនិយាយតែខែមេសា នេះ១ នាយចឺម ត្រូវបានគេកក់តាំងពីថ្ងៃទី០១ រហូតដល់ថ្ងៃទី៣០ ពោលគឺ១ខែពេញតែម្ដង ចំនួនលុយ ដែលត្រូវខាតបង់ក៏មានចំនួនច្រើនគួរសម។ ទោះជាយ៉ាងណា នាយចឺម ពុំមានការសោកស្ដាយខ្លាំងពេកទេ ព្រោះតារាផ្សេងក៏បានជួបប្រទះរឿងបែបនេះដូចគ្នា។ អំឡុងពេលដែលនាយ ចឺម លែងមានការប្រគំតន្ត្រីធំៗច្រៀងតាមខេត្តទៀតនេះ នាយចឺម មិនបានជួបវិបត្តិសេដ្ឋកិច្ចធ្ងន់ធ្ងរឡើយ ព្រោះថាការរកលុយបានកាលពីឆ្នាំមុនៗ នាយបានសន្សំប្រាក់បានមួយចំនួនដែរហើយ។
តាមរយៈការអះអាងរបស់ប្រភពខាងលើបង្ហាញថា ការខាតលុយធំ១ខែ បាត់៣០កម្មវិធីនេះ បញ្ជាក់ថា តារាចម្រៀងប្រចាំផលិតកម្មសាន់ដេ រូបនេះ បាត់លុយមិនក្រោម៦ម៉ឺនដុល្លារឡើយ ក្នុងខែមេសា ព្រោះនាយចឺម ច្រៀង១កម្មវិធី ស៊ីថ្លៃចាប់ពី២ពាន់ដុល្លារឡើងទៅ។ ប៉ុន្ដែទោះជា នាយ ចឺម ធ្លាក់ប្រាក់ចំណូលយ៉ាងណា ក៏ថ្មីៗនេះសង្សារសំណព្វចិត្តរបស់នាយ ស្រីស្អាត អូនហ្វា បានលើកទឹកចិត្តតាមរយៈការធ្វើខួបកំណើតឲ្យ ទាំងកណ្ដាលរាត្រីតែម្ដង។
អំឡុងពេលដែលជំងឺកូវីដ១៩ កំពុងតែវាយលុកខ្លាំង បានធ្វើឲ្យនាយចឺម បាត់លុយធំស្ទើរមិនគួឲ្យជឿ ប៉ុន្តែតារាវ័យក្មេងរូបនេះ ក៏បានចេញបទមច្រៀង១បទ ទាក់ទងនឹងជំងឺនេះផងដែរ គឺបទ «ឆ្នាំឯកា» ដែលផ្ដោតអត្ថន័យ លើសាច់ញាតិមិនបាន ទៅជួបគ្នានៅស្រុកកំណើត ដោយសារតែជំងឺកូវីដ១៩។
សូមបញ្ជាក់ថា ការទម្លាយឲ្យដឹងពីការបាត់បង់ចំណូល ស្ទើរមិននឹកស្មានដល់នេះ គឺមិនត្រឹមតែសម្រាប់តារាចម្រៀង នាយ ចឺម ម្នាក់ប៉ុណ្ណោះទេ ពោលតារាចម្រៀង តារាសម្ដែង តារាកំប្លែង ជាច្រើនរូបទៀត ក៏បានត្អូញត្អែរ ពីការបាត់បង់ប្រាក់ចំណូល ក្នុងអំឡុងពេលនៃជំងឺកូវីដ១៩ កំពុងរាតត្បាតជាសកលនេះដែរ។ និយាយជារួមមិនថា តែតារាចម្រៀង ដែលរស់នៅក្នុងវិស័យសិល្បៈនោះទេ សម្រាប់វិស័យផ្សេងៗជាច្រើនទៀត ក៏រងផលប៉ះពាល់ដូចគ្នាទាំងអស់៕
