អ៉ីតាលីមានការថយចុះអ្នកឆ្លងវីរុសថ្មីៗ ប៉ុន្តែក្រសួងសុខាភិបាលនៅតែមិនទាន់ឱ្យមានការឱប និងថើបគ្នានោះទេ

(អ៉ីតាលី)អនុរដ្ឋមន្រ្តីក្រសួងសុខាភិបាលលោក Pierpaolo Sileri បាននិយាយថា អ៉ីតាលីនឹងវិលត្រឡប់មកកាន់ជីវិតធម្មតាវិញ បន្ទាប់ពីការឆ្លងនៃវីរុស COVID-19 បានបន្តធ្លាក់ចុះ។ អ្នកនយោបាយដែលបានរងគ្រោះដោយសារវីរុសខ្លួនឯងប៉ុន្តែបានជាសះស្បើយឡើងវិញរូបនេះ បានប្រាប់វិទ្យុ Capital នៅទីក្រុងរ៉ូមថា៖ «រលកស៊ូណាមី [COVID-19] ដែលវាយប្រហារនៅភាគខាងជើងប្រទេសអ៉ីតាលីកំពុងថយចុះបន្តិចម្តងៗ ប៉ុន្តែយ៉ាងណាការឱប និងការថើប អាចវិលត្រឡប់មកដូចដើមវិញបាន លុះត្រាតែរកឃើញវ៉ាក់សាំងសម្រាប់វីរុសសិន»។

លោកបានបន្ថែមថា ការហាមឃាត់សកម្មភាពនេះបានរារាំងវីរុសនេះមិនឱ្យរាលដាលនៅភាគខាងត្បូង ហើយលោកបានជំរុញឱ្យជនជាតិអ៉ីតាលីនៅតែបន្ដអនុវត្តការរក្សាគម្លាត និងពាក់ម៉ាស់ពេលចេញក្រៅ ខណៈបន្តប្រយុទ្ធប្រឆាំងនឹង COVID-19 ។ ការរឹតត្បិតនាពេលបច្ចុប្បន្ននៅក្នុងប្រទេសអ៉ីតាលី នឹងត្រូវផុតកំណត់នៅថ្ងៃទី១៣ ខែមេសា ហើយលោកនាយករដ្ឋមន្ត្រី Giuseppe Conte បានបង្ហាញថា សេរីភាពផ្ទាល់ខ្លួននឹងកើតឡើងឆាប់ៗ។

ទោះបីជាអ៉ីតាលីមានការឆ្លងថ្មីថយចុះក៏ដោយ ប៉ុន្តែប្រទេសនេះនៅតែមានចំនួនអ្នកស្លាប់ខ្ពស់បំផុតនៅលើពិភពលោក ដោយមានមនុស្សជាង ១៦,៥០០នាក់ បានបាត់បង់ជីវិត និងជាង ១៣២,០០០នាក់ បានឆ្លងជំងឺ៕